Almatydaǵy shaǵyn jáne orta bıznes – qala ekonomıkasyn alǵa súıreıtin negizgi kúsh. Óńirlik komýnıkasıalar qyzmetinde ótken baspasóz konferensıasynda Almaty qalasy Kásipkerlik jáne ınvestısıalar basqarmasynyń basshysy Alısher Satybaldıev kásipkerlikti damytý, ınvestısıa tartý jáne jańa jumys oryndaryn qurýǵa baǵyttalǵan bastamalar men jobalar týraly aıtyp berdi.
2025 jyldyń 1 maýsymyndaǵy málimetterge sáıkes, Almatyda shaǵyn jáne orta kásipkerliktiń (SHOB) jumys istep turǵan nysandarynyń sany 382,7 myńǵa jetip, ótken jylmen salystyrǵanda 8,9%-ǵa artqan. SHOB qala ekonomıkasynyń 57,5%-yn quraıdy. 2024 jyly shaǵyn jáne orta kásiporyndardyń óndirgen ónimi 24,9 trln teńgege jetip, 13,9%-ǵa ósken.
2025 jyly bıznesti sýbsıdıalaý men qoldaýǵa 70 mıllıard teńge bólindi. Onyń ishinde 52,8 mlrd teńge – jergilikti búdjetten, 17,2 mlrd teńge – respýblıkalyq búdjetten. Osy qarajat esebinen jalpy somasy 61,3 mlrd teńge bolatyn 440 joba qoldaý tapty.
Áleýmettik kásipkerlikti qoldaý – negizgi basym baǵyttardyń biri. Almatyda áleýmettik kásiporyndar tizilimine engizý baǵdarlamasy jumys isteıdi. Bul baǵdarlama aıasynda kásipkerlerge 5 mln teńgege deıingi granttar men salyqtyq jeńildikter usynylady. Atap aıtqanda, áleýmettik kásiporyndarǵa arnalǵan salyq mólsherlemesi 4%-dan 2%-ǵa deıin tómendetilgen. 2022 jyldan bastap atalǵan tizilimge 141 áleýmettik kásiporyn endi. Olar áleýmettik osal toptarǵa arnalǵan taýarlar óndiredi, qyzmet kórsetedi jáne osy top ókilderin jumyspen qamtıdy.
2025 jyldyń alǵashqy bes aıynda Almaty qalasynyń negizgi kapıtalyna tartylǵan ınvestısıa kólemi 714,4 mlrd teńgege jetip, ótken jyldyń sáıkes kezeńimen salystyrǵanda 28,2%-ǵa artty. Bul ósimge jeke ınvestısıalar da eleýli úles qosty – olardyń kólemi 7,9%-ǵa ósip, 557,5 mlrd teńge boldy.
Alısher Satybaldıevtiń aıtýynsha, óńdeý ónerkásibin damytýǵa, sonyń ishinde qalanyń ındýstrıaldy aımaǵyna erekshe nazar aýdarylýda. 2025 jyly jalpy somasy 268,1 mlrd teńgeni quraıtyn 14 jańa jobany iske qosý josparlanyp otyr. Bul jobalar aıasynda shamamen 10 myń jańa jumys orny ashylady. Qazirgi ýaqytta ındýstrıaldy aımaqta 118 kompanıa jumys istep, 557,6 mlrd teńge kóleminde ınvestısıa salyp, 16 myń jumys ornyn qurǵan.
Sonymen qatar, bıyl shaǵyn ındýstrıaldy parkterdiń qurylysy da jalǵasyp jatyr. 2025–2027 jyldar aralyǵynda bul parkterge 245 SHOB nysany ornalastyrylyp, qosymsha 4,3 myń jumys orny ashylady dep kútiledi.
Almatyda kreatıvti ındýstrıalar da qarqyndy damyp keledi. Qalanyń 2025 jylǵa deıingi damý baǵdarlamasynda bul sala ekonomıkany ártaraptandyrýdyń basym baǵyttarynyń biri retinde belgilengen. Osy baǵyt aıasynda 2024 jyly «Markova 44» kreatıvti haby ashyldy. Búginde bul keńistik podkast-leıblderden bastap, táýelsiz teatrlarǵa deıin 14 rezıdenttiń mekenine aınaldy. 2024 jyly habta 170-ke jýyq is-shara ótkizildi – olardyń qatarynda dárister, kıno kórsetilimderi men sheberlik sabaqtary bar.
«Almatyda kreatıvti keńistikterge degen suranys artyp keledi. Sondyqtan bıyl biz kreatıvti kásipkerler úshin jeńildetilgen jalǵa alý mehanızmin engizýdi josparlap otyrmyz», – dedi Alısher Satybaldıev.