Qazaqstan men Qytaı eli arasyndaǵy iskerlik jáne ınvestısıalyq baılanystardy damytýǵa arnalǵan jıyn ótti.
İs-sharaǵa Qytaı Halyq Respýblıkasynyń Almatydaǵy Bas konsýly Szán Veı, Almaty oblysy ákiminiń orynbasary Baqytuly Baqytnur, Atyraý oblysy ákiminiń orynbasary Marat Murzıev sondaı-aq eki eldiń 70-ten astam kompanıasy jetekshileri qatysty.
Olardyń qatarynda tabysty jumys istep júrgen kásipkerlermen birge elimizge jańa ınvestısıa salýdy josparlap júrgen ınvestorlar da bar.
Sesıa jumysy Qazaqstan Prezıdenti Qasym-Jomart Toqaevtyń bıylǵy Joldaýynda aıtylǵan kásipkerlikti qoldaý men halyqaralyq saýda-ınvestısıany damytý jónindegi bastamalar aıasynda uıymdastyryldy.
Bul basqosý Qazaqstan men Qytaı arasyndaǵy ekonomıkalyq baılanysty jańa deńgeıge kóterýdi kózdeıdi.
Jıynǵa muryndyq bolǵan
«Dostyq kópiri» halyqaralyq kásipkerler odaǵynyń tóraǵasy Muqan Mamythan:
– Bizdiń maqsatymyz - shekara asyp kelgen ınvestorlar men jergilikti kásipkerler arasynda ózara tıimdi áriptestik ornatyp, ekijaqty jobalardy júzege asyrýǵa jaǵdaı jasaý. Bul tek iskerlik qatynastardy ǵana emes, dostyq pen baýyrlastyqty da nyǵaıtýǵa úles qosady - dedi.
Shara aıasynda aımaqtardyń ınvestısıalyq áleýeti tanystyrylyp, otandyq jáne Qytaı kásiporyndary arasynda yntymaqtastyq týraly birqatar mańyzdy memorandýmdarǵa qol qoıyldy.