Qala kúnine oraı «Kóktóbe» shyńynda halyqaralyq festıvál – «Kóktóbe Opera – 2025» ótti. Búkil konsert halyq artısi, maestro Aleksandr Belákovtyń jetekshiligindegi AlJazz Symphony estradalyq-sımfonıalyq orkestriniń súıemeldeýimen órbidi.
Baǵdarlama Muqan Tólebaevtyń «Birjan-Sara» operasynan «Mereke bıimen» bastaldy. Ony «Saltanat» bı ansambli men hor oryndady. Sondaı-aq, La Bella kvarteti halyq áni «Gúlderaıymdy» oryndady, al Abaı atyndaǵy Qazaq ulttyq opera jáne balet teatrynyń jetekshi solısi Nurǵalym Amanbaı Bızeniń operasynan Smıttiń serenadosyn oryndady.
Kórermender Sulýjan Elýbaevanyń pan-fleıtada Djeıms Lasttyń «Jalǵyz baqtashy» shyǵarmasyn oryndaýyn erekshe yqylaspen qabyldady. «Astana Opera» teatrynyń solısi Rasýl Jarmaǵambetov Rossınıdiń «Sevıldik shashtaraz» operasyndaǵy Fıgaronyń kavatınasyn usyndy. Qazaqstannyń halyq artısi Jámıla Baspaqova Ardıtıdiń názik te áserli «Il Bacio» ánin oryndasa, Abaı atyndaǵy teatrdyń solısi Balýan Berkenov Pýchchınıdiń «Toska» operasynan Kavaradossı arıasyn shyrqady.
Álemdik sahnalardy baǵyndyrǵan ıspandyq tenor Enrıke Ferrer keshtiń kórigin qyzdyrdy. Ol «Granada» shyǵarmasy men Pýchchınıdiń «Turandot» operasynan Kalaf arıasyn oryndady. Álemge áıgili Con te partiro dýetin Enrıke Ferrer opera dıvasy Zarına Altynbaevamen birge shyrqady.
Japon balerınasy Arısa Hasımoto men Abaı atyndaǵy QazUOBT jetekshi solısi Rústem Imangalıev Chaıkovskııdiń «Shelkýnchık» baletinen áserli adajıo bılep, keshke kórkin kirgizdi.
Sonymen birge Abaı atyndaǵy QazUBOT jetekshi solısİ Oksana Davydenko Bızeniń «Karmen» operasyndaǵy habanerany jáne «Gladıator» fılminen Now We Are Free kompozısıasyn oryndap, kórermenderdi baýrap aldy. Al Il Canto kvarteti Abaı ánderinen popýrrı jáne «Památı Karýzo» shyǵarmasyn tartý etti.
Jambyl atyndaǵy fılarmonıanyń jetekshi solıseri — halyqaralyq baıqaýlardyń laýreaty, vıolonchelıs Musa Kerimbaev, skrıpkashy Erkebulan Saparbaev jáne baıanshy Ǵalymjan Naryńbetov óner kórsetip, áserli áýenderimen kórermendi tánti etti.
Abaı atyndaǵy QazUBOT solıseri Nurjan Bájekenov pen Venera Alpysbaeva Lloıd Ýebberdiń áıgili «Opera elesi» múzıklindegi dýetti oryndady.
«Qurmet» ordeniniń ıegeri, Abaı atyndaǵy QazUOBT jetekshi solısi Zarına Altynbaeva Pýchchınıdiń «Djannı Skıkkı» operasynan Laýretta arıasyn jáne Loý múzıklinen «Meniń ádemi hanymym» shyǵarmasyndaǵy Elıza ánin naqyshyna keltire oryndady.
Keshtiń sharyqtaý shegi Úkili Ybyraıdyń halyq áni «Gákký» jáne Verdıdiń «Travıata» operasynan áıgili sahnalyq kórinis boldy. Ony Jámıla Baspaqova, Zarına Altynbaeva, Enrıke Ferrer, Balýan Berkenov, Venera Alpysbaeva, Nurjan Bájekenov jáne hor birlesip oryndady.
Mereke Aleksandr Zasepınniń «Gúl Almaty» ánimen aıaqtaldy. Barlyq artıser sahnaǵa shyǵyp, orkestr súıemeldeýimen bul ándi sonshalyqty shabytpen oryndady, kórermender tik turyp, uzaq qol soqty. Kesh sońynda «Gúl Almatyny» búkil zal qaıtadan qosyla shyrqaǵanda bul án naǵyz merekelik ánuranǵa, qalaǵa degen mahabbattyń nyshanyna aınaldy.