Mınıstrlik qazaqstandyqtarǵa onlaın bankıngtiń parolin jıi aýystyryp turýǵa keńes berdi.
Krımınaldyq polısıa departamenti Kıberqylmysqa qarsy kúres ortalyǵynyń bastyǵy Jandos Súıinbaı ınternet alaıaqtyqtan saqtanýdyń joldaryn atady, dep habarlaıdy Almaty-akshamy.kz QazAqparatqa silteme jasap
«Statısıka boıynsha, halyqtyń 90%-y ınternet qoldanady. Jelide bolǵan kezde mynadaı saqtyq sharalaryn qaperde ustaý kerek. Eshqandaı jaǵdaıda ózin bank qyzmetkeri nemese quqyq qorǵaý organdarynyń ókili retinde tanystyryp, telefon arqyly nusqaý beretin adamdardyń sózine senbeý kerek. Quqyq qorǵaý organdary eshqandaı arnaıy operasıany telefon arqyly júrgizbeıdi. Sondyqtan plasık kartanyń rekvızıtteri, aqsha aýdarymyn jasaǵany týraly túbirtekter, kodtar men kilt sózder sıaqty jeke bastyń derekterin eshkimge, tipti bank pen quqyq qorǵaý qyzmetkerlerine de berýge bolmaıdy», - deıdi Jandos Súıinbaı.
Onyń aıtýynsha, jeke derekterdi beıtanys, tekserilmegen saıttarǵa engizýge de bolmaıdy. Telefon arqyly berýge bolmaıdy.
«Teksermeı turyp, aldyn ala tólem jasaýdan aýlaq bolý qajet. Taýardy alǵannan keıin ǵana aqysyn jiberýge tyrysqan jón. Kúdikti kelisim úshin aqsha aýdarýǵa, tabys kózi ashyq kórsetilmegen qarjylyq sqemalarǵa qatysýǵa bolmaıdy. Uıaly telefonǵa tek App Store, Play market arqyly júktelgen qosymshalardy ornatyp, qoldaný qajet», - dedi İİM ókili.
Sondaı-aq ol beıtanys nómirden kelgen nemese ekranǵa qaıta-qaıta shyǵa beretin spam-habarlamalarǵa jaýap berýge, siltemelerge kirýge bolmaıtynyn eskertti.
«Alaıaqtar kóbinese silteme arqyly ótip tólem jasaýdy usynady. Olaı isteýge bolmaıdy. Bankıng qyzmetine kirý úshin qoıylǵan parólderdi jıi aýystyryp otyryńyz. Bankterdiń ózi usynatyn 3D-qorǵanys qyzmetin paıdalanyńyz. Gadjetke lısenzıasy bar antıvırýs baǵdarlamasyn ornatý qajet. Parólderdi kúrdeli etip quryp, paıdalaný kerek. Baılanystyń qaýipsizdigin tekserip baryp kirý qajet. Gadjetterge «baladan qorǵanys» fýnksıasyn ornatqan artyq bolmaıdy. Internettegi jeke bas derekterin shektep, qupıa derekterdi ınternet arqyly berýden saq bolǵan jón», - dedi ortalyq bastyǵy.