Jyldyq mánde ınflásıa 16,1 paıyzǵa jetti.
QR Ulttyq bank tóraǵasy Ǵalymjan Pirmatov ınflásıaǵa qatysty túsinik berdi, dep habarlaıdy Almaty-akshamy.kz QazAqparatqa silteme jasap.
«Ulttyq banktiń Aqsha-kredıt saıasaty komıteti 2022 jylǵy 6 qyrkúıekten bastap bazalyq mólsherlemeni 14,5 paıyz deńgeıinde saqtaý týraly sheshim qabyldadyq. Sheshim kelesi boljamdy raýndtyń nátıjeleri negizinde qabyldandy. Biz bıyldyń sońyna deıin jáne orta merzimdi kezeńge ınflásıa men naqty jalpy ishki ónimniń ósýi boıynsha baǵalaýdy jańarta otyryp, makroekonomıkalyq ahýaldyń budan bylaıǵy damýyna qatysty boljamdarymyzdy ózgerttik», - dedi Ǵalymjan Pirmatov elordada ótken baspasóz máslıhatynda.
Onyń aıtýynsha, ınflásıanyń aılyq dınamıkasy osy jylǵy naýryzdaǵy eń joǵarǵy deńgeıden tómendeýine qaramastan, ortasha jyldyq mánderden asyp, áli de joǵary deńgeıde qalyp otyr.
«Jyldyq mánde ınflásıa 16,1 paıyzǵa jetti. Azyq-túlik ónimderi baǵasynyń ósýi jyldyq mánde 20,8 paıyzǵa jetip, eń kóp úles qosyp otyr. Azyq-túlikke jatpaıtyn ınflásıa da ımporttyq taýarlardyń qymbattaýyna baılanysty 15,5 paıyzǵa deıin ósti. Atap aıtqanda, bul suranystyń ósýi aıasynda sharýashylyq taýarlaryna, sondaı-aq keńse taýarlaryna qatysty boldy», - dep túsindirdi UB basshysy.
Onyń sózine qaraǵanda, aqyly qyzmetter ınflásıasy 10,1 paıyzǵa jetti. Jabdyqtalǵan turǵyn úıdi jalǵa berý boıynsha baǵanyń eń joǵary ósýi baıqalyp otyr. 2022 jylǵy 1 shildege deıin tarıfterdi kóterýge qoıylǵan moratorıı aıaqtaldy. Osy oraıda barlyq óńirlerde monopolıs kásiporyndardyń qyzmetterine tarıfter ózgerdi. Osylaısha, olardyń aılyq ósimi 1,3% boldy.
Ǵalymjan Pirmatovtyń paıymynsha, ınflásıa qatysty baǵalaý áli de joǵary bolyp tur. Bıyldyń qorytyndysy boıynsha jańartylǵan boljamdarǵa sáıkes, ınflásıa 16-18 paıyz deńgeıinde bolýy múmkin. Bul Ulttyq banktiń aldyńǵy boljamynan joǵary.