Qazaqstandyq dıdjeı ári mýzykalyq prodúser Imanbek Zeıkenov («Imanbek» laqap atymen tanymal) taǵy da «Gremmı» mýzykalyq syılyǵyna nomınasıalandy.
Bul joly ol argentınalyq ánshi Taichu-men birigip jazǵan kompozısıasymen «Best Latin Electronic Music Performance» (Latyn elektronıkasy boıynsha úzdik oryndaý) sanatynda baq synaıdy, - dep habarlaıdy Aqshamnews.kz.
2025 jyldyń 18 qyrkúıeginde jarıalanǵan nomınanttar tiziminde Imanbektiń esimi qaıta ataldy. Bul – onyń aty ańyzǵa aınalǵan remıksinen keıingi kezekti halyqaralyq jetistigi.
Imanbek 2019 jyly Saint Jhn-nyń «Roses» ánine jasaǵan remıksimen jahanǵa tanylǵan bolatyn. Sol týyndysy úshin ol 2021 jyly «Gremmı» syılyǵyn jeńip alyp, atalǵan marapatqa ıe bolǵan tuńǵysh qazaqstandyq retinde tarıhta qaldy. Sonymen qatar, ol TMD men burynǵy KSRO elderi arasynda «klasıkalyq emes mýzyka» janrynda marapat alǵan alǵashqy mýzykant atanǵan edi.
Sońǵy bes jyl ishinde «Roses» remıksi YouTube platformasynda 367 mıllıonnan astam qaralym jınap, álemdik deńgeıdegi sátti jobalardyń birine aınaldy.
Jańa nomınasıa jaıly jańalyq taraǵan soń, áleýmettik jeli qoldanýshylary Imanbekti qyzý qoldap, jyly lebizderin bildirýde. Tyńdarmandar:
«Quttyqtaımyn, sen buǵan ábden laıyqsyń!»
«Keremet! Ádettegideı – ot!»
«Sen – úzdiksiń!» – dep pikir qaldyrýda.