Almaty qalasyndaǵy №6 kitaphanada qala kúnine oraı «Arý qalam Almatym, jaıqalǵan sen gúlimsiń» atty merekelik ádebı-mýzykalyq kesh uıymdastyryldy.
Shara qalaǵa degen ystyq yqylasqa, onyń baı mádenıeti men qaıtalanbas rýhyna toly ortada ótti, - dep habarlaıdy Aqshamnews.kz.
Uıymdastyrýshylar mazmundy baǵdarlama usyndy: qonaqtar Almatynyń ótkenine jáne búgingi kúnine qyzyqty tarıhı sholý jasap, qalanyń sulýlyǵyn jyrlaǵan óleńder men ánderdi tyńdady, sondaı-aq qurmetti qonaqtarmen jyly shyǵarmashylyq áńgimelerge qatysty.
Kesh barysynda belgili mádenıet jáne óner qaıratkerleriniń sózderi erekshe áser qaldyrdy. Olardyń qatarynda jazýshy Nurdáýlet Aqysh, ánshi Nurjamal Áshimhan, M.Áýezov atyndaǵy Ádebıet jáne óner ınstıtýtynyń ǵylymı qyzmetkeri Oralbek Almas jáne «Tomırıs Patshaıymy» ordeniniń ıegeri, akademık Botan Kereıqulova bar. Almatynyń rýhanı kelbeti týraly aıtylǵan olardyń júrekjardy sózderi kórermenderdi erekshe tolqytty.
«Almaty — asqaq Alataýdyń baýraıyndaǵy altyn qala. Bul jerde talaı talanttar dúnıege keldi. Árbir tań bul qalaǵa shabyt syılaıdy, árbir kesh úmit syılaıdy. Biz úshin ol máńgilik jastyqtyń jáne baı rýhanı álemniń sımvoly bolyp qala beredi», — dep atap ótti ánshi Nurjamal Áshimhan.
Kesh qonaqtary qala tarıhyna arnalǵan kitap kórmesimen tanysyp, jergilikti ónerpazdardyń mýzykalyq qoıylymdaryn tamashalady. Olar merekeniń shynaıy sánine aınalyp, kórermenderge qýanyshty kóńil-kúı men birlik sezimin syılady. İs-sharadan qatysýshylar júzderinde kúlkimen, júrekterinde jyly ásermen jáne Almatyǵa degen súıispenshiligi odan ári artyp qaıtty.