Ázerbaıjan prezıdenti Ilham Alıev Aqtaý mańynda bolǵan ushaq apatynan keıin qazaqstandyq qutqarýshylardyń batyldyǵyn joǵary baǵalady, dep habarlaıdy aqshamnews.kz
«Oqıǵa oryn alǵan sátten bastap qazaqstandyq qutqarýshylar dereý apat ornyna kelip, adamdardy qulaǵan ushaqtan qutqarýǵa kiristi. Olar óz ómirlerin qaterge tikti, óıtkeni jarylys bolýy múmkin edi. Ushaqtyń bir bóligi janyp jatqanda, ekinshi bóliginiń órtenýi qaýpi boldy. Biraq soǵan qaramastan, olar naǵyz erlik kórsetti», – dedi Ázerbaıjan prezıdenti.
Sonymen qatar, ol qazaqstandyq medısına qyzmetkerleriniń kásibıligine erekshe toqtaldy.
«Jaralanǵan jolaýshylar dereý medısınalyq mekemelerge jetkizildi. Bul úshin de Prezıdent Toqaevqa rızashylyǵymdy bildirdim», – dedi Ilham Alıev.
Prezıdent Ázerbaıjan halqynyń qazaqstandyq baýyrlardyń qoldaýyn erekshe baǵalaǵanyn atap ótti.
«Qazaqstandyq baýyrlarymyzdyń yntymaqtastyǵy Ázerbaıjan halqynyń júreginde tereń iz qaldyrdy. Qarapaıym azamattar Aqtaýdaǵy konsýldyǵymyzǵa kelip, gúl shoqtaryn qoıyp, qoldaý bildirdi. Bul shynaıy dostyq pen baýyrlastyqtyń kórinisi», – dep erekshe toqtaldy.
Alıev ushaq apaty saldarynan qaza tapqan alty qazaqstandyqtyń otbasyna kóńil aıtty. Óz kezeginde, QR Prezıdenti Qasym-Jomart Toqaev Ázerbaıjan basshysyna kóńil bildirdi.
«Bul qaıǵyly oqıǵa úlken synaq boldy. Biraq men bul synaqtan keıin bizdiń dostyǵymyz ben baýyrlastyǵymyz burynǵydan da nyǵaıa túskenine senimdimin», – dedi Ázerbaıjan Prezıdenti.