Halyqty selden qorǵaý maqsatynda bóget salynady.
İle Alataýy ulttyq tabıǵı saıabaǵynyń 20,90 ga jeri erekshe qorǵalatyn aýmaqtan shyǵarylýy múmkin. Ol jerlerge turǵyndardy selden qorǵaý maqsatynda bóget salynady. Bul týraly Orman sharýashylyǵy jáne janýarlar dúnıesi komıtetiniń qaýlysy ashyq talqyǵa shyǵaryldy, dep habarlaıdy Almaty-akshamy.kz.
Qaýlyda ulttyq park terıtorıasynda ornalasqan Aqsaı ózeni baseıni sel qaýpi joǵary aýmaq ekeni jazylǵan. Al oǵan jaqyn jerde 30 myńnan astam turǵyn qonystanǵan.
«Aqsaı ózeniniń baseıninde sel qaýpi joǵary 18 ýchaske, 25 muzdyq, 16 morenalyq kól (olardyń 5-eýi asa qaýipti) ornalasqan. Olar 30 myńnan astam adamnyń ómirine qaýip tóndiredi. Sondyqtan Almaty qalasy men Almaty oblysynyń halqyn selden qorǵaý maqsatynda 20,90 ga jer erekshe qorǵaý aýmaǵynan shyǵarylyp, qosalqy jerler sanatyna engizilsin. Ol jerge bóget salynady», - delingen qujatta.
Erekshe qorǵalatyn terıtorıadan shyǵarylatyn aýmaqtardyń basym bóligi jaıylymdyq jerler men ormansyz alqaptar. Qaýly 13 shildege deıin talqylaýǵa shyǵaryldy.