İshki ister mınıstrligi jol júrisine qatysýshylarǵa úndeý jasady, dep habarlaıdy Almaty-akshamy.kz Polisia.kz-ke silteme jasap.
«Qurmetti jol júrisine qatysýshylar! Jol erejesin saqtaýdyń mańyzdy ekenin esterińizge salamyn. Azamattardyń joldaǵy qaýipsizdigi – bizdiń basty mindetimiz. Apat saldary tek materıaldyq emes, adam shyǵynyna da alyp keledi. Bul máselege jaýapkershilikpen sanaly túrde qaraıtyn bolsaq, qaıǵyly jaǵdaılardyń aldyn alýǵa bolady. Júrgizýshiler qaýipsizdikti qamtamasyz etýde erekshe ról atqarady. Kóp nárse olardyń qyraǵylyǵyna, tártibine jáne jol erejelerin saqtaýyna baılanysty», – dedi İİM ÁPK erekshe tapsyrmalar jónindegi aǵa ınspektory Aqtoty Boranova.
Vedomstvoda júrgizýshilerden kelesi jaǵdaılarǵa erekshe nazar aýdarýdy surady:
– Jyldamdyq rejımin saqtap, joldaǵy jaǵdaıdy eskerińiz;
– Jol qozǵalysynyń basqa qatysýshylaryna, jaıaý júrginshilerge, ásirese balalar men qarttarǵa muqıat bolyńyz;
– Joldaǵy áreketterińiz týraly eskertý úshin burylys sıgnaldaryn paıdalanyńyz;
– Qaýipti jaǵdaılardy boldyrmaý úshin ara-qashyqtyqty saqtańyz;
– Kólikti basqarý kezinde telefon nemese basqa da dúnıelerge nazar aýdarmańyz;
– Avtokólik ishinde balalardyń qaýipsizdigine erekshe nazar aýdaryńyz, olardy ustaý qurylǵylaryn paıdalanyńyz;
– Birlesip qana biz joldardy qaýipsiz ete alamyz. Sizdiń jaýaptylyǵyńyz ózge bireýdiń ómirin qutqarýǵa septigin tıgizýi múmkin ekenin umytpańyz. Ózińizge jáne jaqyndaryńyzǵa abaı bolyńyz! – dedi Aqtoty Boranova.