Kelesi oqý jylynan bastap vedimistik JOO-da úsh jańa bilim berý baǵdarlamasy paıda bolady. Bul týraly Óńirlik komýnıkasıalar qyzmetiniń alańynda İİM Almaty akademıasy basshysynyń orynbasary, polısıa polkovnıgi Erjan Bımoldanov málimdedi, dep habarlaıdy almaty-akshamy.kz
Akademıada "Quqyq qorǵaý qyzmeti", "Kıberqaýipsizdikti qamtamasyz etý", "İİO qyzmetin IT-krımınalıstıkalyq qamtamasyz etý", "Aqparattyq júıeler" sıaqty úsh jańa baǵyt boıynsha ishki ister organdary júıesiniń kásibı kadrlary daıyndalady.
"Sońǵy jyldary kıberqylmys, ınternet-alaıaqtyq tek Qazaqstandy ǵana emes, búkil álemdi dúr silkindirdi. Osy qylmystarǵa tıimdi qarsy turý kerektigin eskere otyryp, jańa bilim berý baǵdarlamalaryn ashý týraly sheshim qabyldandy. Osy baǵytta Astana jáne Almaty qalalarynyń polısıa departamentterinde kıberqylmystardy ashýmen jáne tergeýmen aınalysatyn arnaıy bólimsheler ashyldy. Olar kıberpol dep atalady. Biz osy bólimshelerdiń qyzmetkerlerin Almaty akademıasynyń qabyrǵasynda oqytatyn bolamyz", - dedi E. Bımoldanov.
Sonymen qatar, akademıada qazirgi jáne bolashaq qyzmetkerlerdi ınternet arqyly jasalatyn qylmyspen kúresý boıynsha jumys daǵdylaryna úıretý úshin kıberzerthana men kıberpolıgon ashyldy.
Akademıa tegin bilim alyp, jaıly jataqhanada turýdy qamtamasyz etedi. Sondaı-aq artyqshylyqtar qatarynda tegin tamaq, formalyq kıim, medısınalyq qyzmet kórsetý, turǵylyqty jerine barý jáne keri qaıtarý (poıyzben) kiredi. Kýrsanttar shákirtaqy alady. Oqý merzimi merzimdi áskerı qyzmet ótkerýmen teń.
Oqýdy aıaqtaǵannan keıin bitirýshilerge «Ulttyq qaýipsizdik jáne áskerı ister bakalavry» jáne «Kıberqaýipsizdikti qamtamasyz etý salasyndaǵy bakalavr» biliktilikteri bar memlekettik úlgidegi dıplom beriledi, sonymen qatar «polısıa leıtenanty» arnaıy ataǵy beriledi.
Oqýǵa túsý boıynsha turǵylyqty jeri boıynsha aýdandyq (qalalyq) polısıa basqarmalaryna (bólimderine) nemese tikeleı Almaty akademıasyna júginińiz. Nemese +7-705-755-25-77, +7-775-930-55-88 telefondary boıynsha aqparat alýǵa bolady. Úmitker medısınalyq komısıadan jáne dene shynyqtyrý daıyndyǵy boıynsha synaqtardan ótýi kerek. UBT nátıjesi 50 baldan tómen bolmaýy tıis.