III shaqyrylymdaǵy Qoǵamdyq keńestiń jańa quramy 60%-ǵa jańardy
Otyrys barysynda «Qoǵamdyq keńester týraly» QR Zańyna sáıkes Qoǵamdyq keńes qyzmetiniń qurylymyna qatysty uıymdastyrý máseleleri qaraldy, dep habarlaıdy Almaty-akshamy.kz.
Qoǵamdyq keńestiń tóraıymy bolyp Kóbeeva Altynaı Ormanqalıqyzy saılandy. Altynaı Kóbeeva azamattyq sektorda 25 jyldan astam qyzmet atqaryp kele jatqan, birneshe úkimettik emes uıymdardy basqarǵan, qalanyń damýyna mol atsalysyp júrgen azamatshalardyń biri. Osymen qatar Qoǵamdyq keńestiń birinshi jáne ekinshi shaqyrylymdarynyń múshesi jáne hatshysy bolǵan. Bul uıymnyń jumysy men erekshelikterin biledi. Qazirgi tańda «Aqparattyq-resýrstyq ortalyq» Qoǵamdyq qorynyń basshysy bolyp tabylady.
Sondaı-aq, Qoǵamdyq keńestiń 5 komısıasynyń qurylymy bekitilip, komısıa basshylary saılandy.
- Komýnaldyq ınfraqurylym, utqyrlyq, ekologıa, qarjy, aktıvter jáne qaýipsizdik jónindegi komısıa – tóraǵasy Japarov Borıs Alıkenuly.
- Qurylys, jer qatynastary, ýrbanıstıka, energetıka jáne sýmen jabdyqtaý jónindegi komısıa – tóraǵasy Shıbýtov Marat Maksýmuly.
- Qoǵamdyq damý, mádenıet, sport jáne jastar jónindegi komısıa – tóraǵasy Kamalov Bahtıar Kamaluly.
- Ekonomıka, kásipkerlik, ınvestısıalar, sıfrlandyrý, týrızm jónindegi komısıa – tóraǵasy Qapasov Dýman Jandosuly.
- Densaýlyq saqtaý, bilim berý jáne jumyspen qamtý jónindegi komısıa - tóraıymy Qasymjanova Janat Kákimseıitqyzy.
Sonymen qatar, Almaty qalasynyń Qoǵamdyq keńesiniń Tóralqasy saılandy, onyń quramyna Qoǵamdyq keńestiń tóraǵasy, Máslıhat hatshysy jáne komısıalardyń basshylary endi.
Aıta keteıik, otyrys Almaty.tv YouTube arnasynda jáne Máslıhatynyń YouTube, Aitube arnalarynda tikeleı efırde kórsetildi.
Esterińizge sala keteıik, Máslıhattyń kezekten tys XIX sesıasynda Almaty qalasy Qoǵamdyq keńesiniń quramy bekitildi. Saılaýǵa 200-ge jýyq adam qatysty.
Jalpy, III shaqyrylymdaǵy Qoǵamdyq keńestiń jańa quramy 60% - dan astamǵa jańardy. Jańa quramnyń sapalyq taldaýy kelesideı: Qoǵamdyq keńes músheleriniń ortasha jasy 11 jasqa jasardy, ıaǵnı 47 jasqa deıin. Burynǵy shaqyrylymmen salystyrǵanda jastar sany 5,1-den 25,7% - ǵa deıin, al áıelderdiń úlesi 33,3% - ǵa deıin ósti. Jalpy, keńestiń negizi ÚEU men BAQ ókilderinen turady, olardyń sany keńes músheleriniń jalpy sanynyń jartysynan astamyn qurady, sondaı-aq bilim berý salasy ókilderiniń úlesi artty. Budan basqa, Qoǵamdyq keńestiń jańa quramyna kóp balaly analar men qandastar endi.
Jańartylǵan quramǵa barlyǵy 39 adam kirdi, olardyń 36-sy azamattyq qoǵam ókilderi. Zańnamaǵa sáıkes memlekettik organdar ókilderi músheleriniń sany 1/3 quraýy múmkin, bul rette azamattyq sektor men jurtshylyq ókilderi úshin kvotany 36 adamǵa deıin keńeıtý týraly sheshim qabyldandy.