8-9 qyrkúıek kúnderi Ózbekstannyń Hıýa qalasynda Halyqaralyq etnosport samıti ótti.
Atalmysh jıynǵa 60-tan astam eldiń úkimettik sheneýnikteri, federasıa ókilderi men ǵalymdary, sondaı-aq qazirgi ýaqytta Dúnıejúzilik etnosport konfederasıasyna kirgen elderdegi arnaıy mekemelerden 24 ókil keldi, dep habarlaıdy Almaty-akshamy.kz.
Sondaı-aq, samıtke Dúnıejúzilik etnosport konfederasıasynyń prezıdenti Najmeddın Bilál Erdoǵan men Ózbekstan Respýblıkasy Jastar saıasaty jáne sport mınıstri Adham Ikramovtyń arnaıy shaqyrtýymen Qazaqstan Respýblıkasy Týrızm jáne sport vıse-mınıstri Sársen Quranbek pen Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov ta qatysty.
Samıt aıasynda Joǵary deńgeıdegi Mınıstrler alqasy, etnosport festıvali jáne Dúnıejúzilik etnosport konfederasıasy músheleriniń VI kezdesýi sıaqty mańyzdy is-sharalar uıymdastyryldy.
Talqylaýlar ótken keleli jıyndarda ulttyq sport túrlerin damytý jáne onyń aýqymyn keńeıtý máseleleri qozǵalyp, naqty usynystar aıtyldy.
Jıynda arnaıy sóz alǵan Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov samıtke qatysýshylardy kelesi jyly Qazaqstanda ótetin V-shi Dúnıejúzilik Kóshpendiler oıyndaryna shaqyryp, birqatar máselelerdi kóterdi.
«Álemdik tájirıbege súıenetin bolsaq, qandaı da bir sport túrin joǵary deńgeıge kóterý úshin eń aldymen ony reglamenttep, erejesin jasap jetildirý qajet. Onsyz eshqandaı sport tıisti deńgeıde damymaıdy.
Sol sekildi túrkitildes memleketter jınalyp ulttyq sport túrlerine ortaq ereje bekitip, normatıvtik bazasyn qalyptastyrý arqyly bolashaqta ulttyq sporttyń bir túrin Olımpıada oıyndarynyń baǵdarlamasyna kirgizsek barshamyzdyń ortaq jeńisimiz bolar edi.
Sondyqtan da Búkilálemdik etnosport konfederasıasyna múshe barlyq memleketter judyryqtaı jumyla alǵa qoıǵan ortaq maqsattarymyzǵa jetemiz degen úmittemin» dep aıtty Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov.
Aıta keteıik, búginde Dúnıejúzilik etnosport konfederasıasyna 16 memleket múshe. Olar: Qazaqstan, Qyrǵyzstan, Túrkıa, Ázirbaıjan, Mońǵolıa, Vengrıa, Grýzıa, Reseı, Argentına, Japonıa, Meksıka, Polsha, Katar, Rýmynıa, Týnıs, Lıtva.
.