Sońǵy otyrysta Rysqalıev birinshi aıǵaǵynan bas tartqan bolatyn
Prokýror Laýra Asanova sot tergeýin qaıta bastaýdy usyndy, dep habarlaıdy Almaty-akshamy.kz AtyrauPress-ke silteme jasap.
Oǵan sebep sońǵy otyrysta Atyraý oblysy mádenıet basqarmasynyń burynǵy basshysy Aqylbek Rysqalıevtyń Baqytgúl Hamenovaǵa qatysty keltirgen aıǵaǵynan bas tartýy edi.
– Rysqalıev sońǵy aıǵaǵynda oǵan antıkor qyzmetkerlerinen qysym bolǵanyn aıtty. Ony anyqtaý úshin sol kezdegi jaýap alǵan antıkor qyzmetkerleri Izat Muratov, Maqsat Muratov pen Murat Nurmuhanovtan onlaın formatta jaýap alǵan jón dep esepteımin, – dedi ol.
Alaıda buǵan aıyptalýshy taraptar kelispedi.
- Qorǵaýymdaǵy Aqylbek Rysqalıev óz aıǵaǵynda antıkor qyzmetkerlerinen qysym bolǵanyn aıtqany ras. Biraq, naqty kim ekenin ataǵan joq. Oǵan sol jerdegi adamdardyń kóptigi jáne sol sáttegi kóńil kúıiniń qalypty bolmaýy sebep bolǵan, – dedi Rysqalıevtyń qorǵaýshysy Nurlan Jolbolov. – Biraq, antıkor qyzmetkerleri muny moıyndamaıtyny belgili. Sondyqtan, olardan jaýap alyp ýaqyt ótkizbegen durys dep oılaımyn, – dedi advokat.
Degenmen, sot prokýrordyń ótinishin qabyl aldy. Sot tóraǵasy men advokattarǵa onlaın baılanys arqyly jaýap bergen kýágerler Rysqalıevke eshqandaı qysym bolmaǵanyn, ony arnaıy beınejazbalardan kórýge bolatynyn atap ótti. Endi sot otyrysy bir aptadan keıin, ıaǵnı, 27 qazan kúni jalǵasady.
Aıta keteıik, sońǵy otyrysta Rysqalıev birinshi aıǵaǵynan bas tartqan bolatyn. Aıyptalýshynyń aıtýynsha, oǵan antıkor qyzmetkerleri qysym kórsetken.