Tabystyń mardymsyzdanýyna ınflásıanyń ósýi áser etip otyr.
Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Inflásıa ósken saıyn halyqtyń naqty tabysy qunsyzdanyp jatyr. Jurttyń tabysyn áleýmettik salanyń shyǵysy esebinen arttyrýdyń da shegi bar. Biz osy shekke jetken sıaqtymyz. Buǵan qosa, tutyný nesıeleriniń kólemi artyp barady. Bul áreket – ınflásıa kezinde jan baǵýdyń amaly. Biraq mundaı ahýaldyń áleýmettik jáne saıası saldary óte aýyr bolýy múmkin. Tipti, bankterdiń ózine qaýip tóndirýi yqtımal», – dedi Memleket basshysy.
Prezıdent nesıeni eń aldymen, paıda ákeletin bızneske, ıaǵnı tıimdi jobalarǵa berý kerektigin basa aıtty.
«Sonda jalaqysy joǵary jumys oryndary paıda bolady. Jurttyń kásipkerlikpen aınalysýǵa yntasy artady. Bir sózben aıtsaq, azamattardyń tabysyn kóbeıtýge múmkindik týady», – dedi Qasym-Jomart Toqaev.