Bıyl elimizdiń Qarýly kúshteri 34 baıqaýdyń jeteýine qatysyp, tórt «altyn» jáne bir «kúmis» júlde oljalady
Qarýly kúshterdiń Ulttyq áskerı-patrıottyq ortalyǵynda tankıster kúnine arnalǵan saltanatty jıyn ótti, dep habarlaıdy Almaty-akshamy.kz Qorǵanys mınıstrligine silteme jasap.
Ásker sapyndaǵy tankıster men ardagelerdi quttyqtaǵan Qorǵanys mınıstri general-polkovnık Rýslan Jaqsylyqov tankıster jaýyngerlik daıyndyq deńgeıin udaıy arttyryp qana qoımaı, kásibı sheberlikterin shyńdap, is-qımyldyń jańa tásilderin meńgeretinin atap ótti.
«Tankıster batyldyǵymen, shydamdylyǵymen, tabandylyǵymen erekshelenedi. Olar taktıka men shuǵyl is-qımyldy, qarý-jaraq pen áskerı tehnıkany urysta qoldaný negizderin tereń meńgergen. Qorǵanys mınıstrliginiń basshylyǵynda árdaıym tank áskerlerinde qyzmet etken generaldardyń da bolýy kezdeısoqtyq emes», – dedi vedomstvo basshysy.
General-polkovnık Rýslan Jaqsylyqov óziniń áskerı boryshyn abyroımen atqaryp júrgen áskerı qyzmetshilerge, sondaı-aq qoǵam isine jáne jastardy áskerı-patrıottyq tárbıeleýge belsene aralasýdy jalǵastyryp kele jatqan Qarýly kúshterdiń ardagerlerine gramotalar men alǵys hattar tabys etti.
Saltanatty jınalys barysynda Qorǵanys mınıstri 2022 jylǵy tamyzda ótken Halyqaralyq armıa oıyndarynyń sońǵy qorytyndylaryn jarıalady. Bıyl elimizdiń Qarýly kúshteri 34 baıqaýdyń jeteýine qatysyp, tórt «altyn» jáne bir «kúmis» júlde oljalady. Osylaısha, jalpy esepte 38 eldiń ishinde úshinshi orynǵa ıe boldy.
«Barlyǵy da jeńistiń ońaı kelmegenin kórdi. Shyn máninde, bul jarystar bizdiń áskerı ekıpajdar, eseptoptar úshin synaq alańy boldy. Jaýyngerler moraldyq jáne psıhologıalyq turǵyda jetilip, jeńiske degen sheksiz erik-jigerin, óz kásibine jáne áskerı mamandyqqa adaldyǵyn osy saıystarda anyq kórsetti», – dedi general-polkovnık Rýslan Jaqsylyqov.
Qorǵanys mınıstri áskerı saıystarda úzdik nátıje kórsetken áskerı qyzmetshilerge vedimistik «El qorǵany» medaldaryn tabys etip, sonymen qatar merziminen buryn áskerı ataqtar berdi.