Ózbekstanda keıingi 7 jylda alǵash ret halyqaralyq aqyndar aıtysy ótti.
Jyr dodasy jergilikti qazaq mádenı ortalyǵynyń qoldaýymen uıymdastyryldy. Aıtýly alamanǵa qazaq pen qyrǵyzdyń arqaly aqyndary jınaldy, dep habarlaıdy Almaty-akshamy.kz.
24.kz saıtynyń málimetinshe, uzyn yrǵasy 10 júırik qatysqan aıtystyń bas júldesine 10 mln som, ıaǵnı 400 myń teńge tigildi, al jalpy júlde qory 1 mln teńgege jýyqtady.
Bul keshte kórermen qyz ben jigit, aǵa men ini, qazaq pen qyrǵyz arasyndaǵy ázili jarasqan ádemi aıtystyń kýási boldy. Dostyq hám yntymaq uǵymy keń nasıhattalyp qana qoımaı, el men jerde bolyp jatqan oqıǵalar sulý sózben cýretteldi.
«Aıtys ádemi bolyp jatyr. Budan artyq bolmaıdy. Bárine raqmet. Jańa jyl bárimizge tabys ákelsin. Elimiz, jurtymyz tynysh bolsyn», - deıdi Tashkent turǵyny Sanabat Saparbekova.
Aqyndar aıtysy 60 jyldan beri jergilikti telearna efırinen túspeı kele «Zamandas-Dıdar» baǵdarlamasynyń mereıtoıyna oraılastyryldy. Shyǵarmashylyq ujym Ózbekstannyń túkpir-túkpirin aralap, qandastardyń tynys-tirshiligin baıandaıdy. Mádenıeti men óneriniń damyp, urpaqtan urpaqqa mura bop qalýyna qosqan úlesi zor.
Jyr báıgesi 4 saǵatqa sozyldy. Sheshýshi synda qazaqstandyq Nurlan Esenqulov pen ózbekstandyq qandas Talǵat Orynbekov kezdesti. Aqyndar eldik máselelerdi kóterip, urymtal tusta bir-birin synap-minep te aldy. Tartysty ótken fınaldyń nátıjesinde bas báıge Nurlannyń enshisine buıyrdy. Al Talǵat birinshi orynǵa laıyq dep tanyldy. Qyrǵyzstan jáne Qaraqalpaqstan atynan synǵa túskender de júlde enshilep, eline oljaly oraldy.