Almatyda 2025 jyly «Halyq qatysatyn búdjet» baǵdarlamasy boıynsha 300-den astam joba júzege asyrylady, dep habarlaıdy aqshamnews.kz
«Halyq qatysatyn búdjet» (HQB) baǵdarlamasy aıasyndaǵy daýys berý qorytyndysy boıynsha iske asyrylatyn jobalardyń sany 308 boldy. Aýdandyq ákimdikter men saraptamalyq keńester budget.open-almaty.kz saıtynda ótken onlaın daýys berý nátıjesin qorytyndylady. Jalpy alǵanda, jobalarǵa 163,5 myń daýys berildi, bul 2023 jylmen salystyrǵanda 31%-ǵa artyq. Eń kóp joba usynǵan Alataý aýdanynda – 50, odan keıin Almaly aýdanynda – 45 joba, Áýezov jáne Bostandyq aýdandarynda – 42 jáne 41 joba maquldanǵan. Eń azy Naýryzbaı aýdanynda – 26 joba.
Aıta ketsek, HQB-nyń 2025 jylǵa arnalǵan ár aýdan boıynsha saraptamalyq keńesterdiń sheshimderi «Qujattar» bóliminde jarıalanǵan. Árbir ótinimniń mártebesin «Jobalar» qosymsha betindegi «Mártebe» súzgisi arqyly tekserýge bolady.
Esterińizge sala keteıik, onlaın daýys berý 2024 jyly 22 qazan men 1 qarasha aralyǵynda ótti, nátıjesi 7 qarashaǵa deıin qorytyndylandy. Kelesi kezeńde búdjet ótinimderin qalyptastyrý 31 jeltoqsanǵa deıin jalǵasady. Jobalardyń 2025 jyly júzege asyrylady.
«Halyq qatysatyn búdjet» baǵdarlamasy týraly keńes nemese aqparat alý úshin aýdandyq ákimdikterge nemese Almaty ákimdiginiń qoǵamdyq qabyldaý bólmesi Open Almaty-ǵa 224 39 29 (ishki 203) telefony arqyly habarlasýǵa bolady.
Almaty ákimi Erbolat Dosaevtyń tapsyrmasymen 2024 jyly «Halyq qatysatyn búdjet» baǵdarlamasyn qarjylandyrý 18,8 mlrd teńgege deıin ulǵaıdy (2023 jyly 12,9 mlrd bolǵan). Qazirgi ýaqytta aýdandyq ákimdikter 2023 jyly daýys berý nátıjesi boıynsha jeńimpaz bolǵan jobalardy júzege asyrýda. Búgingi kúnge deıin 2019-2023 jyldar aralyǵyndaǵy ótinimder boıynsha 1 186 joba júzege asyryldy.