Keńes Odaǵynyń Batyry №1 Halyq qaharmany, táýelsiz Qazaqstannyń tuńǵysh Qorǵanys mınıstri, armıa generaly Saǵadat Nurmaǵambetovtyń ǵasyrlyq mereıtoıyna oraı Qarýly kúshterdiń Memlekettik áskerı-tarıhı murajaıy "Halyq júregindegi qaharman" atty kóshpeli kórme uıymdastyrdy.
Batyrdyń biregeı jádigerleri úshin alǵashqy alań Almatydaǵy Ortalyq memlekettik murajaı boldy. Mýzeıge kelýshiler úshin mańyzdy oqıǵa bolǵan kórmeniń ashylýyna Almaty óńirlik garnızonynyń áskerı qyzmetshileri, áskerı joǵary oqý oryndarynyń kýrsanttary jáne «Jas sarbaz» balalar-jasóspirimder áskerı-patrıottyq qozǵalysynyń tárbıelenýshileri qatysty, dep habarlaıdy almaty-akshamy.kz.
Kórmeniń ashylýynda Qarýly kúshter Ulttyq áskerı-patrıottyq ortalyǵy Almaty fılıalynyń estradalyq-bı toby óner kórsetti. Suńqar Álımusa Nurlan Nurtazınniń «Saǵadat» ánin oryndady.
– Taqyryptyq turǵydan biz kórme materıaldaryn soǵysqa deıingi, Uly Otan soǵysy jyldaryndaǵy jáne táýelsiz Qazaqstannyń Qarýly kúshterin qurýdaǵy tuńǵysh Qorǵanys mınıstriniń rólin kórsetetin úsh kezeńge bóldik, – dep túsindirdi Memlekettik áskerı-tarıhı mýzeıdiń bastyǵy Lázzat Áljan.
Kórmege tarıhı fotosýretter, Keńes Odaǵynyń Batyry ataǵyn berý týraly Jarlyqtyń, Altyn juldyzdyń kóshirmeleri jáne fýrajka, beldik, kobýra, gımnasterka, shınel, bylǵary qolǵap, etik, general pogondary sıaqty Saǵadat Nurmaǵambetovtyń jeke zattary qoıylǵan. Bir qyzyǵy, jádigerlerdiń arasynda onyń jaqyn týystary bile bermeıtin sırek fotosýretter de kezdesedi.
Almatydaǵy kórme 31 qańtarǵa deıin jalǵasady. Sosyn bul qundy jádigerler elimizdiń ózge de on qalasyn aralamaq.
