QR Indýstrıa jáne ınfraqurylymdyq damý mınıstri Beıbit Atamqulov aýyldarǵa sý berý jumystarynyń josparyn baıandady, dep habarlaıdy almaty-akshamy.kz QazAqparatqa silteme jasap.
«Elimizde barlyǵy 6 316 aýyl bar. Onyń ishinde 3 991 aýyl ortalyqtandyrylǵan sýmen jabdyqtalǵan, 403 aýylda keshendi blok-modýlder ornatylǵan. Sýmen jabdyqtalmaǵan 1 922 aýyldyń máselesin sheshý úshin mynadaı sharalar qabyldap jatyrmyz. 793 aýylda ortalyqtandyrylǵan sýmen jabdyqtaý júıelerin salý josparlanǵan. 200-den az adam turatyn shaǵyn aýyldarda keshendi blok-modýlder ornatylady», - dedi Beıbit Atamqulov Úkimettiń búgingi otyrysynda.
Onyń aıtýynsha, bıyl taǵy 148 aýyldy ortalyqtandyrylǵan sýmen jabdyqtaý jáne halqy az 220 aýylǵa keshendi blok-modýl ornatý josparlanǵan.
«Búgingi tańda ortalyq sýmen jabdyqtaý josparlanǵan 85 aýylda (BQO, Atyraý, Túrkistan, Almaty, Jambyl, Qaraǵandy, SHQO, Aqmola, Aqtóbe) gıdrogeologıalyq jumystar júrgizý qajet. Keshendi blok-modýl ornatý josparlanǵan halqy az 170 aýylda izdestirý-barlaý jumystaryn júrgizý qajet. Memleket basshysynyń tapsyrmasyn ýaqytyly oryndaý maqsatynda qalǵan 453 aýyl boıynsha 2023 jylǵa deıin jobalaý-smeta qujattamasyn ázirleýdi aıaqtaý qajet», - dedi mınıstr.