Almatyda Sátbaev ýnıversıtetiniń mereıtoıy men Qanysh Sátbaevtyń 125 jyldyǵyna arnalǵan forým bastaldy
Sátbaev ýnıversıtetiniń 90 jyldyǵy: Almatyda tórtinshi ónerkásiptik revolúsıanyń syn-qaterlerine arnalǵan forým ótip jatyr, dep habarlaıdy aqshamnews.kz
Almaty qalasynyń ákimi Erbolat Dosaev Sátbaev ýnıversıtetiniń 90 jyldyǵy men Qazaqstandaǵy geologıalyq mekteptiń negizin qalaýshy jáne Ulttyq ǵylym akademıasynyń alǵashqy prezıdenti Qanysh Sátbaevtyń 125 jyldyǵyna arnalǵan «Eýrazıanyń ǵylymı-ınjenerlik qaýymdastyǵynyń aldyndaǵy tórtinshi ónerkásiptik revolúsıanyń syn-qaterleri»atty Halyqaralyq ǵylymı forýmnyń ashylý saltanatyna qatysty.
Forýmnyń ashylýynda qala ákimi Qazaqstan Prezıdenti Qasym-Jomart Toqaevtyń quttyqtaý jedelhatyn oqyp, ýnıversıtet ujymyn mereıtoımen quttyqtady.
Forým 11-15 qarasha aralyǵynda Almaty qalasynda ótedi. Oǵan 22 elden 200 uıym men kásiporynnyń, qazaqstandyq jáne sheteldik joǵary oqý oryndarynyń, elshilikter men konsýldyqtardyń ókilderi qatysady.
Baǵdarlama aıasynda STROYTECH ınjenerlik ortalyǵy men tehnoparkiniń, Hyundai Engineering zertteý ortalyǵynyń ashylýy, Massachýsets tehnologıalyq ınstıtýtynyń standarttary boıynsha qurylǵan Customized FabLab tanystyrylymy ótedi. Forým barysynda plenarlyq otyrys, tehnologıalardy transferleý, memleket, ǵylym jáne bıznestiń ózara árekettestigi, jas ǵalymdardyń mansaptyq ósýi jóninde paneldik sesıalar uıymdastyrylady.
Jaqynda Sátbaev ýnıversıteti eki tarıhı jetistikke qol jetkizdi. Ýnıversıtet QS Stars syılyǵyna ıe bolyp, halyqaralyq seriktestermen bilim berý baǵdarlamalarynyń joǵary deńgeıin rastady. Sonymen qatar, Sátbaev atyndaǵy QazUTZÝ Azıadaǵy úzdik 100 ýnıversıtettiń qataryna enip, 4000 azıalyq joǵary oqý ornynyń arasynda pozısıasyn nyǵaıtty. Ol Shanghai University, Pusan National University sıaqty ýnıversıtettermen qatar turyp, University of Macau, Singapore Management University sekildi bedeldi azıalyq joǵary oqý oryndaryn basyp ozdy.
