2025 jylǵy 23 mamyrda QR Ǵylym jáne joǵary bilim mınıstrliginiń uıymdastyrýymen elimizdiń ǵylymı jáne joǵary bilim berý uıymdaryna arnalǵan respýblıkalyq HR-forým ótti. Atalǵan aýqymdy shara Qazaq ulttyq qyzdar pedagogıkalyq ýnıversıtetinde ótti, dep habarlaıdy aqshamnews.kz.
Forýmǵa elimizdiń óńirlerinen ǵylymı-zertteý ınstıtýttary men joǵary, sondaı-aq joǵary oqý ornynan keıingi bilim berý uıymdarynyń adamı resýrstardy basqarý jónindegi mamandary, HR salasynyń sarapshylary, ýnıversıtet basshylary jáne oqytýshylar qatysty.
İs-sharanyń saltanatty ashylýynda Qazaqstan Respýblıkasy Ǵylym jáne joǵary bilim mınıstrliginiń Personaldy damytý jáne basqarý departamentiniń dırektory Aınur Myrzabekova mınıstr Saıasat Nurbektiń quttyqtaý hatyn oqyp berdi.
«Bul forým – elimizdiń bilim jáne ǵylym júıesindegi HR salasyn damytýǵa, zamanaýı kadrlyq saıasatty jetildirýge baǵyttalǵan mańyzdy alań. Qatysýshylar arasynda tájirıbe almasýǵa, úzdik praktıkalardy bólisýge jáne adamı kapıtaldy basqarýdyń jańa tásilderin birlese aıqyndaýǵa mol múmkindik beretin ıgi bastama. Adamı resýrstar kez kelgen uıymnyń tabysty damýynyń negizi. Sondyqtan kadr saıasatyn tıimdi júrgizý, daryndy mamandardy tartý men ustap qalý, olardyń kásibı damýyna jaǵdaı jasaý – bizdiń ortaq mindetimiz», – delingen hatta.
Qazaq ulttyq qyzdar pedagogıkalyq ýnıversıtetiniń rektorynyń mindetin atqarýshy Erkin Shajauly Dúsipov óz sózinde forýmda adamı kapıtaldy damytýdyń jańa tásilderi, kadrlyq úderisterdi zamanaýı talaptarǵa saı beıimdeý joldary talqylanatynyn atap ótti.
Shara barysynda baıandamashylar joǵary oqý oryndaryndaǵy HR-menedjmenttiń ózekti máselelerin kóterip, akademıalyq ortadaǵy kadrlyq prosesterdi sıfrlandyrý, kadrlyq rezerv qalyptastyrý, tıimdi motıvasıalyq mehanızmder men oqytýshylardy kásibı turǵyda qoldaý tetikterin jetildirý joldaryn usyndy.
«Forýmǵa vedimistik joǵary oqý oryndary shaqyrylyp, 63 ýnıversıtetten 78 adam keldi. Shaada qatysýshylar tájirıbe almasyp, eńbekpen qamtý salasyndaǵy bar máselelerdi talqylady, kadr mamandaryn tolǵandyrǵan, sonyń ishinde biliktilik talaptary men ýnıversıtetterdiń akademıalyq erkindiginiń taralý deńgeıine qatysty suraqtar qoıdy. Biz keri baılanys alyp, mańyzdy suraqtar qoıdyq, bolashaqtaǵy ózara is-qımyl joldaryn aıqyndadyq», – dep atap ótti QyzPU HR-departamentiniń dırektory Iýlıa Mıkropýlo.
Kezdesý aıasynda Qudaıbergen Jubanov atyndaǵy Aqtóbe óńirlik ýnıversıtetiniń HR-departament dırektory Erkin Tastanqulov óz pikirin bildirdi.
«Forýmǵa arnaıy kelgenime óte qýanyshtymyn. Búgingi respýblıkalyq HR-forým – Konstıtýsıada kórsetilgen adamı resýrstardyń mańyzdylyǵyna negizdelgen, joǵary deńgeıde uıymdastyrylǵan mańyzdy is-shara. Elde sapaly bilim júıesin qalyptastyrý úshin eń aldymen adamı kapıtaldy damytýymyz qajet. Qazirgi tańda joǵary oqý oryndarynyń deńgeıi birtindep artyp keledi. Eger biz tehnologıalyq damýdan qalys qalǵymyz kelmese, adam resýrstarymen tikeleı jumys isteıtin mamandardyń kásibı biliktiligin arttyrýǵa baǵyttalǵan sharalardy júıeli túrde ótkizip turýymyz kerek. HR salasynyń ókilderiniń biliktiligin arttyrý arqyly biz sapaly bilim beretin bilikti mamandardy jumysqa tartýǵa jol ashamyz», – dedi.
Qazaqstannyń bilim jáne ǵylym júıesi úshin mańyzdy oqıǵaǵa aınaǵan HR-forým elimizdegi joǵary oqý oryndarynda kadrlyq áleýetti strategıalyq damytý men HR-tásilderdi jańǵyrtýǵa múddeli kásibı mamandardy biriktirdi.