Memleket basshysy Halyqaralyq elektr baılanysy odaǵynyń bas hatshysy Dorın Bogdan-Martındi qabyldady, dep habarlaıdy aqshamnews.kz
Kezdesýde Qazaqstan men Halyqaralyq elektr baılanysy odaǵy arasynda sıfrlyq jáne telekomýnıkasıalyq tehnologıalar baǵytyndaǵy yntymaqtastyq perspektıvasy talqylandy.
Qasym-Jomart Toqaev Dorın Bogdan-Martındi Halyqaralyq elektr baılanysy odaǵynyń 160 jyldyǵymen quttyqtap, uıym sıfrlyq tehnologıalar salasyndaǵy jahandyq yntymaqtastyqta mańyzdy ról atqaratynyn aıtty.
Prezıdent zamanaýı sıfrlyq ekojúıe men damyǵan ınfraqurylym qalyptastyrý máselesine aıryqsha mán berdi. Osy oraıda Qazaqstannyń OneWeb, Starlink, Amazon Kuiper jáne Shanghai Spacecom Satellite Technology sıaqty tómen orbıtaly jer serikteri júıesi jobalaryna belsendi túrde qatysatynyn atap ótti.
Bas hatshy Dorın Bogdan-Martın elimizdiń sıfrlyq ındýstrıany damytýǵa jáne jasandy ıntellekt tehnologıalaryn engizýge baǵyttalǵan kúsh-jigerine joǵary baǵa berdi. Sondaı-aq Halyqaralyq elektr baılanysy odaǵynyń Qazaqstanmen seriktestikti odan ári tereńdetýge jáne birlesken bastamalardy keńeıtýge daıyn ekenin jetkizdi.