2025 jyldyń 24-27 sáýiri aralyǵynda XVIII «Rıga kóktemi – 2025» halyqaralyq horeografıalyq baıqaýy ótti.
Baıqaýǵa Roza Baǵlanova atyndaǵy «Qazaqkonsert» memlekettik akademıalyq konserttik uıymynyń «Gúlder» ansambliniń balet ártisi Sanıa Sákenova men bas baletmeıster Anvara Sadyqova qatysty, dep habarlaıdy aqshamnews.kz.
Baıqaý horeografıanyń úsh atalymy boıynsha ótti. Atap aıtsaq, klasıkalyq bı, halyq bıi jáne zamanaýı horeografıa. Baıqaýǵa Qazaqstannan bólek Germanıa, Italıa, Latvıa, Lıtva, Estonıa, Ýkraına, Soltústik Afrıka elderinen ónerpazdar qatysty.
Ansámbl solısi Sanıa Sákenova İ dárejeli laýreat atanyp, eki altyn medal jeńip aldy. Ol baıqaý baǵdarlamasynda Anvara Sadyqova qoıǵan «Aqbaıan» qazaq bıin jáne Ernur Qaryqbol qoıǵan «Temýlen» mońǵol bıin bıledi. Sondaı-aq, ansámbl bıshisi oryndaýshylyq sheberligi men ártistik óneri úshin Amerıka Qurama Shtattaryndaǵy Margo Fonteın atyndaǵy Balet akademıasynda eki aptalyq oqý stıpendıasynyń sertıfıkatyna ıe boldy.
«Gúlder» ansambliniń bas baletmeısteri Anvara Sadyqova men Sanıa Sákenova Margo Fonteın balet akademıasynyń kórkemdik jetekshisi Kennet Laddenniń arnaıy shaqyrtýyn aldy.
Sonymen qatar, qazylar alqasynyń sheshimi boıynsha «Gúlder» ansambli «Ulttyq bı mádenıetin saqtaý jáne damytý» arnaıy syılyǵymen marapattaldy.