Qazaqstannyń Fransıadaǵy elshisi Jan Ǵalıev eki eldiń strategıalyq seriktestigin tereńdetý úshin óńirlerdiń orasan zor áleýetiniń bar ekenin atap ótti.
Fransıanyń Overn-Ron-Alpi óńirinde Qazaqstannyń Qurmetti konsýldyǵynyń ashylý saltanaty ótti, dep habarlaıdy Almaty-akshamy.kz
Overn-Ron-Alpi óńiriniń kompanıalary Qazaqstanmen sement, tıtan quımalary, kún batareıalaryna arnalǵan fotoelementter jáne t.b. óndirý sıaqty sektorlarda burynnan jumys istep keledi. Sonymen qatar, sırek jer elementterin ázirleýde, «jasyl» sýtegi óndirisinde, sondaı-aq taý týrızmin damytýda yntymaqtastyqty keńeıtýde áleýet bar.
Elshi Qazaqstannyń jańa Qurmetti konsýlynyń úzdik qasıetteri men kásibıligin erekshe atap ótti.
«Sofı Sıdostyń taǵaıyndalýy Fransıadaǵy qurmetti konsýldyqtardyń basynda áıelderdiń rólin arttyrady», - dedi ol.
Óz kezeginde Sofı Sıdos Elshi men Qazaqstan Syrtqy ister mınıstrliginiń basshylyǵyna senim bildirgeni úshin alǵysyn bildirdi. Ol basqaratyn Louis Vicat qory Qazaqstannyń Fransıadaǵy Elshiliginiń mádenı is-sharalaryn ótkizýge únemi járdemdesetinin atap ótken jón. Jumys barysynda ol Qazaqstanmen dostyq jáne jyly qarym-qatynas ornatty. MEDEF Isère-di (kásipkerler qaýymdastyǵynyń jergilikti bólimshesi) basqaratyn Sofı Sıdos sonymen qatar óńirdegi kompanıalardyń Qazaqstanmen baılanysyn nyǵaıtýǵa nıetti.