Prezıdent Qasym-Jomart Toqaevtyń shaqyrýymen 19-21 maýsym kúnderi Germanıanyń Federaldy Prezıdenti Frank-Valter Shtaınmaıer Qazaqstanǵa memlekettik saparmen keledi, dep habarlaıdy Almaty-akshamy.kz.
Aqordanyń resmı aqparaty boıynsha, Frank-Valter Shtaınmaıer Mańǵystaý oblysyna saparmen baratyn alǵashqy eýropalyq prezıdent bolmaq.
Sapar aıasynda eki el basshylary kelissózder júrgizedi. Kelissózder barysynda saýda-ekonomıka, ınvestısıa salalaryndaǵy yntymaqtastyqty keńeıtýge, kólik-logıstıka jáne energetıka salalaryndaǵy qatynastardy damytýǵa, sondaı-aq gýmanıtarlyq baılanystardy tereńdetýge basa mán beriledi. Qazaqstan men Germanıa arasyndaǵy strategıalyq seriktestiktiń jaı-kúıi men ony nyǵaıtý perspektıvalary qarastyrylady.
Kelissózder qorytyndysy boıynsha ekijaqty birqatar qujatqa qol qoıylady dep josparlanyp otyr.
Sonymen qatar Germanıanyń Federaldy Prezıdenti Qazaqstan men Germanıa ýnıversıtetteri rektorlarynyń forýmynda sóz sóıleıdi.
Budan bólek, eki el prezıdentteri qazaq-german bıznes forýmyna qatysady.
Frank-Valter Shtaınmaıer sapar aıasynda Mańǵystaý oblysyna baryp,óńirdiń ekonomıkalyq áleýetimen tanysady.
GFR Prezıdenti Qazaqstan-Germanıa ınjınırıń ınstıtýtynyń ashylýyna jáne Svevind shved-german kompanıasynyń jasyl sýtegi óndiretin zaýytynyń synama burǵylaý jumystaryn bastaý rásimine qatysady dep josparlanyp otyr.