Astanada Qazaqstan Ulttyq Olımpıadalyq komıtetiniń prezıdenti Gennadıı Golovkın, Qatar UOK basshysy, Ulttyq Olımpıadalyq komıtetter qaýymdastyǵynyń vıse-prezıdenti sheıh Djoan bın Hamad bın Halıfa Ál-Tanımen resmı kezdesý ótkizdi.
Sondaı-aq resmı is-sharaǵa Azıa Olımpıadalyq keńesiniń bas dırektory jáne World Aquatics uıymynyń prezıdenti Hýseın ál-Mýsallam, QR Týrızm jáne sport mınıstri Erbol Myrzabosynov, Qazaqstan UOK bas hatshysy Álimjan Aqaev jáne Qazaqstan sý sporty túrleri federasıasynyń prezıdenti Nurlan Jaqypov qatysty, dep habarlaıdy aqshamnews.kz UOK-ke silteme jasap.
Kezdesý barysynda Azıa Olımpıadalyq keńesi men Qazaqstan arasyndaǵy yntymaqtastyq, olımpıadalyq qozǵalysty damytý jáne birlesken jobalardy júzege asyrý máseleleri, onyń ishinde bıyl Astanada ótetin Qurlyqtyq sportshylar forýmyn uıymdastyrý jaıy talqylandy.
Atalmysh forýmǵa Azıanyń 45 elinen sporttyq komısıalardyń ókilderi, sondaı-aq Halyqaralyq Olımpıadalyq komıteti (HOK) men Azıa Olımpıadalyq keńesiniń jetekshileri qatysady dep josparlanyp otyr.
Taraptar Qazaqstan men Qatar UOK arasyndaǵy áriptestikti keńeıtýge jáne World Aquatics uıymynyń Qazaqstan sý sporty túrleri federasıasymen yntymaqtastyǵyn nyǵaıtýǵa basa nazar aýdardy.
Kezdesý qorytyndysy boıynsha taraptar halyqaralyq sporttyq yntymaqtastyqty damytýǵa qyzyǵýshylyǵyn bildirip, josparlanǵan bastamalardy júzege asyrý boıynsha aldaǵy naqty qadamdardy kelisip aldy.