Qazaqstan Gaza sektoryndaǵy azamattaryn evakýasıalaı bastady
Qazaqstan Gaza sektoryndaǵy azamattaryn evakýasıalaý prosesin bastady. Bul týraly Syrtqy ister mınıstrliginiń resmı ókili Aıbek Smadıarov málimdedi, dep habarlaıdy almaty-akshamy.kz
«Qazaqstannyń Mysyrdaǵy, Iordanıadaǵy jáne Izraıldegi Elshilikteriniń úılesimdi jáne naqty is-qımylynyń arqasynda búgin otandastarymyzdy Gaza sektorynan evakýasıalaý prosesi bastaldy. Búgin, 13 qarashada 44 azamattan turatyn birinshi toptyń evakýasıasy josparlanǵan. Bul topqa Qazaqstannyń 40 azamaty jáne olardyń 4 sheteldik otbasy músheleri kiredi», - dedi ol.
Onyń atap ótýinshe, Qazaqstannan bólek Marokko, Iordanıa, Reseı, Ispanıa, Shvesıa, Perý, Nıderland, Ulybrıtanıa jáne AQSH óz azamattaryn evakýasıalaıdy.
«Rafak beketinen barlyǵy 594 adam ótedi dep josparlanǵan. Evakýasıa Gaza sektory men Mysyr arasynda ornalasqan Rafak baqylaý-ótkizý pýnkti arqyly júzege asady. Pýnkten ótkennen keıin qazaqstandyqtar Kaırge kólikpen jetkizilip, qonaq úıge ornalastyrylady. Sodan keıin Qazaqstanǵa jetkiziledi. Qazirgi tańda qazaqstandyq dıplomattar Kaırden Rafak pýnktine jolǵa shyqty. Jaqyn arada, bir saǵattyń ishinde jetýi kerek», - dedi Aıbek Smadıarov.