Qazaqstan 2 jyl ishinde Transkaspıı baǵyty boıynsha munaı jetkizýdi 3 mln tonnaǵa deıin arttyrady
Energetıka salasyn damytý Qazaqstan Úkimeti jumysynyń basym baǵyttarynyń biri bolyp qala beredi. Bul munaı-gaz salasyn nyǵaıtýǵa, elektr energetıkalyq ınfraqurylymdy jańǵyrtýǵa jáne jańartylatyn energıa qýatyn arttyrýǵa qatysty.
Máselen, munaı salasynda Teńiz, Qarashyǵanaq jáne Qashaǵan ken oryndaryn keńeıtýge baǵyttalǵan iri jobalardy iske asyrý jalǵasýda. Kaspıı qubyr konsorsıýmy qubyrynyń qazaqstandyq ýchaskesiniń ótkizý múmkindigi jylyna 54-ten 72,5 mln tonnaǵa deıin ulǵaıtyldy. Bul rette Transkaspıı baǵyty boıynsha munaıdyń alǵashqy jetkizilimderi júrgizildi, olar 2 jyl ishinde 3 mln tonnaǵa deıin arttyrylatyn bolady.
Sonymen qatar Shymkent munaı óńdeý zaýytyn keńeıtý boıynsha belsendi jumystar júrgizilip keledi. Nátıjesinde onyń qýattylyǵy jylyna 6 mln tonnadan 12 mln tonnaǵa deıin artyp, ishki naryqtaǵy janar-jaǵarmaı qajettiligin tolyq qamtamasyz etedi.
- Gaz óndirý salasynda jańa ken oryndary iske qosylýda. Óndiriletin qory 31 mlrd tekshemetrden astam gazdy quraıtyn «Rojkovskoe», «Ońtústik Aqsaı» jáne «Anabaı» ken oryndarynda gaz óndirý bastaldy. Orta merzimdi perspektıvada óndiriletin qory 69 mlrd tekshemetr gaz bolatyn «Ortalyq Óriktaý», «Batys Prorva» jáne «Qalamqas» gaz ken oryndaryn iske qosý kútilýde.
Sonymen qatar Qashaǵan men Qarashyǵanaqta, sondaı-aq Jańaózende jańa gaz óńdeý zaýyttaryn salý boıynsha jumystar júrgizilip keledi. «Saryarqa» gaz qubyrynyń 2-shi jáne 3-shi kezegi, «Aqtóbe-Qostanaı» gaz qubyry jáne «Beıneý-Bozoı-SHymkent» gaz qubyrynyń 2-shi jelisi josparlanǵan.
- Bıyl munaı-gaz hımıasyn damytý úshin jalpy quny $1 mlrd-ty quraıtyn Býtadıen jobasynyń qurylysy bastalady. Bul rette Atyraý jáne Aqtóbe oblystarynda $13,7 mlrd somasyna polıetılen, polıetılentereftalat jáne karbamıd óndirý boıynsha basqa da iri ınvestısıalyq jobalardy iske asyrý jalǵasyp keledi.
- Elektr energetıkasy salasyndaǵy jumys elektr tapshylyǵyn joıýǵa jáne ekonomıka úshin qajettilikten kóbirek qýat kózderin qurýǵa baǵyttalǵan. 2023 jyly shamamen 500 MVt bolatyn qýat kózderi iske qosyldy. 2024 jyly 14 joba sheńberinde 825 MVt, onyń ishinde 12 joba aıasynda 260 MVt jańartylatyn energıa kózderi iske qosylady.
- Túrkistan, Almaty jáne Qyzylorda oblystarynda ıkemdi generasıa rejımi bar jylý elektr stansalary salynyp jatyr. Sonymen qatar Ekibastuz GRES-2-de 3-shi jáne 4-shi energıa bloktaryn jańǵyrtý jáne jańa GRES-3 qurylysyna daıyndyq jumystary júrgizilýde. Kókshetaý, Semeı jáne Óskemen qalalarynda jańa JEO salý josparlanyp otyr.
- Total, Masdar, Acwa Power jáne Unigreen Energy strategıalyq ınvestorlarymen birlese otyryp, jalpy qýaty 4 GVt jańartylǵan energıa kózderi jobalaryn iske asyrý boıynsha jumys júrgizilip keledi.