Ótken aptada «QazaqGaz Aimaq» AQ Almaty óndiristik fılıaly Almaty qalasy Medeý aýdanynyń Tótenshe jaǵdaılar basqarmasy qyzmetkerlerimen birlesip, jylytý maýsymyna baılanysty jeke sektordaǵy úılerdegi gaz jabdyqtarynyń qysqa daıyndyǵyn tekserý boıynsha arnaıy reıd júrgizdi.
«QazaqGaz Aimaq» AQ Almaty óndiristik fılıaly Óndiristik-tehnıkalyq bóliminiń basshysy Aıbek Qasymovtyń aıtýynsha, búginge deıin kúzgi-qysqy kezeńge daıyndyq jospary 100% oryndalǵan.
– Almatynyń gaz tutyný baǵytyndaǵy jumystary «QazaqGaz Aimaq» AQ-nyń Almaty óndiristik fılıalynyń erekshe baqylaýynda. Qysqy maýsymǵa 100% daıynbyz. «Saqtyqta qorlyq joq» degen. Búgin sala mamandary tótensheliktermen birigip, taǵy bir márte tekserý jumystaryn júrgizbekpiz. Basty maqsatymyz – jylytý maýsymynyń bastalýyna baılanysty jeke sektordaǵy úılerdiń gaz qubyrlary men jabdyqtaryn tekserý, kógildir otyndy turmysta qaýipsiz paıdalaný, jazataıym oqıǵalardyń aldyn alý boıynsha túsindirý jumystaryn júrgizýdi kúsheıttik. Tekserý barysynda qandaı da bir aqaýdy baıqaıtyn bolsaq, ony arnaıy mamandar sol jerde qalpyna keltirip beredi. Birinshi kezekte áleýmettik osal top sanatyna jatatyn turǵyndardyń úılerine kóńil bólingen. Bul is-sharalar kesheni tutynýshylarǵa gazben qaýipsiz jumys isteý erejelerin taǵy bir ret eske salý úshin ótkiziledi, - deıdi bólim basshysy Aıbek Ómirzaquly.
Sala mamandarynan quralǵan arnaıy top reıd barysynda gaz jelileri men aspaptardyń jaı-kúıine, olarǵa tehnıkalyq qyzmet kórsetý sapasyna nazar aýdardy. Aıta ketken jón, Medeý aýdanynda turmysy kúnkóris deńgeıinen tómen otbasylar kóp. Aýdan ákimdigi olardyń barlyǵyn erekshe baqylaýǵa alǵan. Jylytý maýsymy bastalǵanda olardyń úılerindegi qaýipsizdik sharalary jiti tekseriledi. Máselen, reıd kezinde Potanın kóshesi, 18 mekenjaıynda ornalasqan úıdiń jylytý jabdyǵyna keletin qubyrdan gaz shyǵyp turǵanyn anyqtaǵan mamandar aqaýdy sol jerde jóndep berdi.
– Jylytý maýsymy bastalar aldynda adamdardyń ýly gazdan ýlanyp qalýy, turǵyn úı sektorynda peshterdi durys paıdalanbaý faktileri erekshe alańdaýshylyq týdyrady. Sondyqtan búgin halyqqa órt qaýipsizdigi talaptaryn túsindirý boıynsha profılaktıkalyq jumystar júrgizip jatyrmyz. İs-sharalardy ótkizý barysynda turǵyndarmen peshterdi durys paıdalaný boıynsha túsindirý jumystaryn ótkizdik, aqaýlar anyqtalǵan jaǵdaıda, ıelerine olardy joıý boıynsha usynystar berýdemiz. Órtke qarsy taqyrypta jadynamalar tabystap jatyrmyz, áleýmettik osal toptar – jalǵyzbasty qarıalar, kópbalaly otbasylar erekshe baqylaýymyzda, - deıdi Medeý aýdanynyń tótenshe jaǵdaılar bóliminiń ınjeneri, azamatty qorǵaý leıtenanty Alısher Gızzatov.
Aıta keteıik, «QazaqGaz Aimaq» AQ Almaty óndiristik fılıaly qala boıynsha 4800 shaqyrym gaz qubyry men qubyr boıyndaǵy nysandardyń qalypty jumys isteýine jaýapty.
Sala mamandarynyń aıtýlarynsha, mundaı reıdtik is-sharalar jylytý maýsymy aıaqtalǵanǵa deıin belsendi túrde júrgiziledi. Árıne, jumys óte aýqymdy. Desek te, abonentterge túsindirý jumystaryn júrgize otyryp, jadynama taratý arqyly gaz tutynýdy qaýipsiz etýge kómektesedi.
Tekserý jumysy aıaqtalar sátte mamandar turǵyndardyń qaýipsizdik erejelerine salǵyrt qaramaýyna keńes beredi.