Qazaqstanda mektep jasyna deıingi balalardyń ata-analaryna balalardy kútý jáne damytý boıynsha konsýltasıalyq kómekke qol jetkizýge múmkindik beretin «Beske deıin úlger» mobıldi qosymshasy iske qosylýda.
Bul týraly Oqý-aǵartý mınıstrligi ókilderimen Ortalyq komýnıkasıalar qyzmeti alańynda ótken brıfıńte belgili boldy, dep habarlaıdy aqshamnews.kz.
«Beske deıin úlger» qosymshasy ata-analarǵa úı jaǵdaıynda balalarǵa densaýlyq, tamaqtaný, tárbıe, daǵdylardy damytý jáne balalarmen ózara árekettesý sıaqty mańyzdy máseleler boıynsha qoljetimdi ári túsinikti kontent usynady. Qosymshadaǵy barlyq materıaldar neırobıologıalyq zertteýlerdiń ǵylymı derekterine negizdelip ázirlengen, bul olardyń tıimdiligi men praktıkalyq qundylyǵyn qamtamasyz etedi.
«Qazirgi ýaqytta qosymsha pılottyq rejımde Qaraǵandy, Shyǵys Qazaqstan, Qyzylorda jáne Aqtóbe oblystaryndaǵy mektepke deıingi uıymdarda testilenýde. Tolyq aýqymda iske qosý qarasha aıyna josparlanǵan. Sondaı-aq kontent konsýltasıalyq ortalyqtarda da qoljetimdi bolady», — dep atap ótti mektepke deıingi bilim berý departamentiniń dırektory Manar Adamova.
Ata-analar mektepke deıingi jastaǵy balalardy tárbıeleý jáne damytý máseleleri boıynsha táýlik boıy ádistemelik jáne psıhologıalyq qoldaý ala alady, bul otbasylarda úılesimdi atmosfera qalyptastyrýǵa yqpal etedi.