Kaztraffic-2023 kórmesinde Qazaqstan jol ǵylymı-zertteý ınstıtýtynyń mamandary sheteldik áriptesterine topyraq turaqtandyrǵyshy, betonǵa arnalǵan sińdirý qospasy jáne bıtým modıfıkatory sıaqty otandyq ázirlemelerdi usyndy.
Bul materıaldar qatal klımattyń jol sapasyna áserin eskere otyryp jasalǵan, dep habarlaıdy Almaty-akshamy.kz QR Kólik mınıstrligine silteme jasap.
Atap aıtqanda, QazjolǴZI zerthanasynda ázirlengen topyraq turaqtandyrǵyshy munaı jáne gaz ónerkásibiniń tas jol boıyndaǵy ótkelderin salý úshin de qoldanylatyn jer tóseminiń topyraǵyn nyǵaıtý tehnologıasy bolyp tabylady. Sondaı-aq otandyq materıaldyń quramynda betonǵa arnalǵan sińdirý qospasy bar. Ol avtojoldardyń sement-beton jabyndaryna tıimdi kútim jasaýdy qamtamasyz etedi. Qospanyń quramy betonnyń sýdy sińirýin azaıtady jáne onyń aıazǵa tózimdiligin arttyrady.
Qazaqstandyq ǵalymdardyń taǵy jańashyldyǵy – bul bıtým modıfıkatory. Atalǵan materıal tasymaldaýǵa jáne paıdalaný ornynda bıtým massasyna tikeleı engizý barysynda yńǵaıly. Bul jaǵdaıda modıfıkator arzan komponentter negizinde jasalady.
Kórmege kelgen sheteldik jol sarapshylary men yqtımal ınvestorlar qazaqstandyq ǵalymdardyń jetistikterimen tanysty. Ásirese kórme qonaqtaryn avtojoldardyń deformasıasyna eleýli áser etetin Qazaqstannyń qatal klımatyna otandyq ázirlemelerdiń turaqtylyǵy qyzyqtyrdy. Olardyń aıtýynsha, ınstıtýt jasaǵan materıaldar kólik-logıstıkalyq áleýetin arttyrýǵa baǵdar alǵan elderde paıdaly jáne qoldanýǵa yńǵaıly bolýy múmkin.