Almatyda Qazaqstannyń biryńǵaı ýaqyt beldeýine kóshý máselesine arnalǵan ǵylymı talqylaý ótti. Sátbaev ýnıversıtetinde uıymdastyrylǵan dóńgelek ústeldi QR Ǵylym jáne joǵary bilim mınıstrligi ótkizdi, dep habarlaıdy aqshamnews.kz
İs-sharaǵa 40-tan astam maman qatysty. Olardyń qatarynda QR Ǵylym jáne joǵary bilim mınıstrligi men QR Densaýlyq saqtaý mınıstrliginiń ókilderi, joǵary oqý oryndarynyń basshylary, ǵylymı-zertteý ınstıtýttarynyń mamandary, medısına jáne psıhologıa salasyndaǵy qazaqstandyq sarapshylar, sondaı-aq qoǵamdyq densaýlyq saqtaý jáne memlekettik basqarý salasyndaǵy mamandar boldy.
Qazaqstanda biryńǵaı ýaqyt beldeýine kóshý máselesi qoǵamda túrli pikirler týdyrdy. QR Ǵylym jáne joǵary bilim mınıstri Saıasat Nurbek forýmnyń ashylýynda bul taqyrypty ǵylymı turǵydan qarastyrýdyń mańyzdylyǵyn atap ótti:
«Biz bul máseleni naqty ǵylymı zertteýler turǵysynan talqylaý úshin jetekshi ǵalymdarymyzdy jınadyq. Basty nazarymyz – ult densaýlyǵy», – dedi ol.
Mınıstrdiń aıtýynsha, bul ózgeristiń eresekter men balalar densaýlyǵyna áserin anyqtaý úshin ǵylymı qaýymdastyqtyń pikirin tyńdaý mańyzdy.
Keńestik kezeńnen beri Qazaqstanda «dekrettik ýaqyt» qoldanylyp keldi, ol tabıǵı kún tártibinen aýytqýdy týdyrdy. Bul jaǵdaı adam aǵzasyna keri áser etip, melatonın gormonynyń jetkiliksiz bólinýine sebep boldy. Ǵalymdardyń aıtýynsha, bul gormonnyń jetispeýshiligi sozylmaly aýrýlar men onkologıalyq dertterdiń kóbeıýine yqpal etti.
Shyǵys Qazaqstan jáne Pavlodar oblystaryndaǵy tabıǵı kún tártibine sáıkessizdik densaýlyq kórsetkishterine teris áser etkeni zertteýlerde aıtyldy. Sondaı-aq, burynǵy ýaqyt beldeýinde mektep oqýshylarynyń uıqysy jetispeýshilikke ushyraǵany atalyp ótti.
Astrofızıkter men geograftardyń aıtýynsha, Qazaqstan aýmaǵynyń basym bóligi tabıǵı túrde bir ýaqyttyq beldeýde – UTC+5 aımaǵynda ornalasqan. Bul halyqtyń tabıǵı bıologıalyq yrǵaqpen ómir súrýine qolaıly jaǵdaı jasaıdy.
Forýmda Qazaqstannyń biryńǵaı ýaqyt beldeýine kóshýiniń ekonomıkalyq jáne áleýmettik tıimdiligi de talqylandy. Mysaly, Qytaı men Eýropanyń 33 memleketi biryńǵaı ýaqyt beldeýin qoldanady jáne bul elderde ekonomıka tabysty damyp otyr.
Dóńgelek ústel qorytyndysy boıynsha biryńǵaı rezolúsıa daıyndalyp, memlekettik organdarǵa usynylmaq. Sonymen qatar, bul qujat jurtshylyqqa da jarıa etiledi.
Qazaqstannyń biryńǵaı ýaqyt beldeýine kóshýi – eldiń áleýmettik, ekonomıkalyq jáne densaýlyq saqtaý salalarynda oń ózgerister ákelýge baǵyttalǵan mańyzdy qadam. Bul bastama tabıǵı ómir yrǵaǵyna oralý arqyly qoǵamnyń ómir sapasyn jaqsartýdy kózdeıdi.