Qarýly kúshter Ulttyq áskerı-patrıottyq ortalyǵynyń Áskerı-tarıhı murajaıynda jyl saıynǵy halyqaralyq ǵylymı-praktıkalyq konferensıa ótti, dep habarlaıdy aqshamnews.kz
Oǵan áskerı tarıh, arheologıa, etnografıa, muraǵat isi, murajaıtaný salasyn zertteýshler, qoǵam qaıratkerleri, sondaı-aq Reseı, Qyrǵyzstan, Polsha, Ázerbaıjan jáne Italıa elderiniń ókilderi qatysty.
Zertteýshiler áskerı murany zerdeleý men muraǵat jumysynyń problemalyq aspektilerin qozǵady. Sondaı-aq, qazaq halqynyń ult-azattyq qozǵalysy, qazaqstandyq jaýyngerlerdiń fashısik basqynshylardy jeńýge qosqan úlesi jáne áskerı tarıhtyń basqa da máseleleri týraly aıtyldy.
– Uly Otan soǵysyndaǵy qazaqstandyqtardyń dańqy men róli tarıhymyz ben urpaq úshin óte mańyzdy. Qazaq halqy ejelgi zamannan beri barlyq shaıqastarda erlik pen tabandylyqtyń laıyqty úlgisi bolǵan. Máselen, Shyǵys halyqtarynyń arasynda qazaqtar Keńes Odaǵynyń Batyrlarynyń sany boıynsha birinshi orynda tur. Tarıhta áli de kóptegen aq aqtańdaqtar bar. Habarsyz ketken adamdar áli de kóp. Biz qansha qazaqstandyq tutqynda bolǵanyn bilmeımiz. Sondyqtan Uly Otan soǵysy tarıhyna áli núkte qoıylǵan joq, – dep atap ótti Ǵylym jáne joǵary bilim mınıstrligi Memleket tarıhy ınstıtýty dırektorynyń orynbasary tarıh ǵylymdarynyń doktory Aıaǵan Búrkitbaı.
Bul turǵyda ǵalymdy Astana qalasyndaǵy ázirbaıjandardyń «Hazar» etnomádenı birlestigi» qoǵamdyq birlestiginiń tóraǵasy Mahır Muhtaroǵly qoldady. Ol Uly Otan soǵysynyń tarıhyn jáne Qazaqstannyń Jeńiske qosqan úlesin tereń zertteý qajettigin atap ótti.
Polsha Respýblıkasynyń áskerı attashesi podpolkovnık Aleksandr Sýhenek qazaqstandyq tarapqa tyǵyz yntymaqtastyq úshin alǵysyn bildirip, áskerı tarıh máseleleriniń otandastary úshin mańyzdylyǵyn atap ótti.
Varshavadan onlaın rejımde doktor Eva Kovalska «Ulttyq este saqtaý ınstıtýtynyń izdeý jáne sáıkestendirý bóliminde júrgizilgen Shyǵystaǵy poláktardyń eskerilmegen Jerleý oryndaryn zertteý» atty baıandama jasady.
Konferensıada áskerı murajaılardy damytý jáne Qarýly kúshterdiń jaýyngerlik dástúrleri negizinde jastardy áskerı-patrıottyq tárbıeleý máseleleri talqylandy.