Semeı qalasynda QR Densaýlyq saqtaý mınıstrliginiń Medısınalyq termınologıa komısıasy men Semeı medısına ýnıversıteti birlesip Respýblıkalyq termınologıalyq konferensıa ótkizdi.
Konferensıanyń kún tártibinde bekitilgen medısınalyq termınderdiń biryńǵaı sózdigin ázirleý, densaýlyq saqtaý salasyndaǵy normatıvtik quqyqtyq aktilerdiń termınologıalyq bazasyn qalyptastyrý jáne ózekti medısınalyq termınologıa sózdigin jasaý máseleleri qaraldy.
Konferensıa barysynda jas ǵalymdar medısınalyq termınologıaǵa qatysty ózekti máselelerdi talqylady. Olar ǵylymı jarıalanymdardaǵy abrevıatýralardy, normatıvtik quqyqtyq aktilerdegi termınderdi jáne ǵylymı-medısınalyq tildiń júıelenýin taldaýǵa erekshe nazar aýdardy.
Bólek taqyryp retinde salalyq jasandy ıntellektti engizý máselesi kóterildi, onyń ishinde KAZHealthGPT júıesin ázirleý de bar.
Sonymen qatar, qatysýshylar «Memlekettik tildegi 100 medısınalyq oqýlyq» jobasynyń bolashaǵyna senim bildirdi. Motıvasıa retinde qazaq tilinde oryndalǵan ǵylymı jumystardy yntalandyrýdy jáne ǵylymı jýrnaldardaǵy úzdik jarıalanymdar úshin syıaqylar taǵaıyndaýdy usyndy.
Jas ǵalymdar bul bastamalardyń tabysty bolýyna memlekettik tildiń ǵylym salasyndaǵy róliniń artýy sebep bolady dep sanaıdy. Olar qazaq tili tek kúndelikti ómirde ǵana emes, ǵylymda da laıyqty oryn alýy tıis ekenin atap ótti.