1938-1945 jyldary Jambyl Jabaevtyń ádebı hatshysy bolǵan aqyn Ǵalı Ormanovtyń latyn qarpimen jazylǵan kúndeligi tabyldy.
Halqymyzdyń ardaqty aqyndarynyń biri, qazaq poezıasynyń kórnekti kórkemsóz sheberleriniń biri – Ǵalı Ormanov jer jánnaty – Jetisý ólkesinde dúnıege kelgen.
Qazaq ádebıetine 20-jyldardyń sońǵy shıreginde kelgen, qazaq poezıasynyń qalyptasýyna, damýyna, ósip-órkendeýine erekshe úles qosqan aqynnyń biri. Orystyń, Shyǵystyń klasıkalyq úlgilerin aýdaryp, qazaq ádebıetiniń aýdarma salasynda da birshama úles qosyp, iri jumystardy ıgerdi. Jambyl Jabaevqa 1939-1945 jyldar aralyǵynda ádebı hatshylyq qyzmet atqarǵan. Ol – jan syrlaryn, tabıǵat sıpattaryn sýrettegen, lırıkalyq jyrlaryn azamattyq áýendermen toǵystyra bilgen tolymdy aqyn. Kóptegen óleńder jınaǵynyń, birneshe poema, áńgime jáne ocherkterdiń avtory atandy.
Aqynnyń jıen-nemeresi Aıdar Qyryqbaıulynyń sózinshe, kúndelik shamamen 1939 jyly jazylǵan.
Kúndelik latyn álipbıimen jazylǵan. Sol kúıi saqtalyp, jazýy ózgermegen. Búginde sol kúndelik jazylǵan álipbıdi biletin adamdar az eken. Sondyqtan kúndelikti jańartyp qoıdyq. Aldaǵy ýaqytta aýdarýǵa beremiz. Kúndeliktiń mazmuny boıynsha Jambyl atamyzǵa kimder kelgen, qandaı máseleler talqylanǵan degen sekildi málimet kórsetilgen. Kúndelik eshqaıda jaryq kórmedi. Sondyqtan Jambyl atamyzdyń shyǵarmashylyǵyn zertteýge septigin tıgizedi dep oılaımyn, - dedi ol.
Kúndelikti Ǵalı Ormanovtyń jary Aıtbala Ormanova saqtaǵan. Keıinnen qoldan qolǵa ótip, kúndelik osy kúnge jetken. Búginde kúndelik atamyzdyń qyzy Jamıǵa Ǵalıqyzyna tabystaldy.
Elordada atamyzdyń atyna arnap mektep berilgen. 2007 jyldan beri atalǵan mekteptiń aldyna búst ornatý máselesi kóterilip keledi. Qala ákimi Baqyt Sultanov bolyp turǵan kezinde búdjetten Ǵalı Ormanovtyń bústin ornatý máselesi bekitilgen de bolatyn. Ókinishke qaraı, búgingi kúnge deıin mekteptiń aldyna búst áli ornatylmady. Osy máseleni Nur-Sultan qalasynyń ákimi Altaı Kólginov nazaryna alsa eken, - dep túıindedi sózin A. Qyryqbaıuly.
Aıta keteıik, Ǵ. Ormanov qyrǵyz eposy «Manastyń» 1-kitabyn, A.S. Pýshkınniń, M.Iý. Lermontovtyń, Ian Raınıstiń, F.Maqtymqulynyń birqatar poemasyn, N.V. Gogoldiń «Neva prospektisi» povesin, A.P. Chehovtyń áńgimelerin, M.Tursyn-Zadeniń «Úndistan balladalary» óleń kitabyn, L.N. Tolstoıdyń «Anna Karenına» romanyn qazaq tiline aýdardy.
Aldaǵy ýaqytta Almaty oblysynyń ákimi Amandyq Batalovtyń qoldaýymen Ǵ. Ormanov aýdarǵan L.N. Tolstoıdyń «Anna Karenına» romanynyń 2 tomdyǵy jaryq kóredi.