Osyǵan deıin eki ret álem chempıony atanǵan Fransıa bıyl da favorıtterdiń biri boldy
Qatarda fýtboldan ótip jatqan álem chempıonatynda Fransıa men Marokko quramalary fınaldyń joldamasy úshin jasyl alańǵa shyqty, dep habarlaıdy Almaty-akshamy.kz QazAqparatqa silteme jasap.
Osyǵan deıin eki ret álem chempıony atanǵan Fransıa bıyl da favorıtterdiń biri ekendigin aıqyn tanytty.
Dıde Desham Fransıa quramasynyń kapıtany retinde álem jáne Eýropa chempıony atansa, bapkerlik mansabynda da senimmen alǵa basyp keledi. Budan tórt jyl buryn onyń basshylyǵymen el quramasy altyn medaldi jeńip alǵan edi.
Al Valıd Regragı jattyqtyratyn Marokko quramasy bıyl aıdy aspanǵa shyǵaryp, Afrıka elderi arasynda alǵash ret jartylaı fınalǵa ótti.
Bul oıynda Fransıa quramasynyń jasaǵan alǵashqy shabýyly-aq óz jemisin berdi. Antýan Grızmannyń pasynan keıin Kılıan Mbappeniń eki soqqysyn Marokko qorǵanysy qaıtarǵanymen, birinshi bolyp jetken Teo Ernandes 5-mınýtta dopty qaqpadan bir shyǵardy – 1:0.
Budan keıin qos quramanyń da múmkindikteri bolǵanymen, birinshi taımde esep ózgergen joq.
Ekinshi kezeńde marokkolyqtar kóbirek shabýyldaǵanymen, odan eshteńe shyǵara almady. Esesine 80-mınýtta Kılıan Mbappeniń birneshe oıynshyny aldap ótip, qaqpaǵa baǵyttaǵan dobyna alańǵa tyńnan qosylǵan Rendal Kolo Mýanı aıaǵyn qoıa saldy – 2:0.
Osylaısha, Marokkony 2:0 esebimen tize búktirgen Fransıa 18 jeltoqsanda Messı bastaǵan Argentına quramasymen altyn júldeni sarapqa salady.
Marokkolyqtar 17 jeltoqsanda qola medal úshin básekede Horvatıamen kezdesedi.
Eske sala keteıik, budan buryn Ýgo Lorıstiń óz eliniń rekordyn jańartqanyn, Argentına quramasynyń fınalǵa shyqqanyn jazǵan bolatynbyz.
Sondaı-aq Messı álem chempıonattarynda Argentına quramasynyń úzdik surmergeni atandy.
Úzdik oıynshy Messı álem chempıonattarynyń rekordyn ornatty.