Bıyl qazaqtyń uly oıshyly, aqyny Abaı Qunanbaıulynyń 180 jyl mereıtoıy atap ótiledi. Osyǵan oraı elimizde aǵartýshynyń ómiri men murasyn dáripteý, ony jas urpaqqa tanytý baǵytynda san túrli sharalar ótkiziledi. Al shetelde Abaı qalaı nasıhattalyp júr? Aqshamnews.kz tilshisi shetelde Abaıǵa arnap boı kótergen eskertkishterge sholý jasady.
Mádenıet jáne aqparat mınıstrliginiń málimetinshe, Abaıdyń esimi tek el ishinde emes, shekara asyp, álemge tanyldy. Oǵan dálel – Bosnıa jáne Gersegovına, Germanıa, Grýzıa, Iran, Koreıa, Qytaı, Qyrǵyzstan, Majarstan, Mysyr, Ózbekstan, Reseı, Rýmynıa, Tájikstan, Túrkıa, Túrikmenstan, Ýkraına, Fransıa, Shveısarıa sıaqty memleketterdegi eskertkishter, bústter men memorıaldyq taqtalar.
Fransıa, Renn
e-history.kz
Fransıanyń Renn qalasynda 2016 jyly búst ornatylǵan.
Vengrıa, Býdapesht
e-history.kz
2014 jyly Abaı eskertkishi Vengrıanyń Býdapesht qalasynda ornatylǵan.
Mysyr, Kaır
e-history.kz
Abaıdyń bústi 2016 jyly Kaırdiń ortalyq saıabaqtarynyń birinde ornatylǵan.
Reseı, Máskeý
pamyatniki-v-rossii.ru
2006 jyly Máskeýdiń Qazaqstan elshiliginiń mańynda Abaı Qunanbaıulyna eskertkish qoıylǵan.
Qytaı, Beıjiń
e-history.kz
2014 jyly Beıjińde "Szıntaı" kórkem mýzeıinde Abaı Qunanbaıulynyń eskertkishi qoıylǵan. Ashylý saltanatyna vedomstvonyń sol kezdegi basshysy Erlan Ydyrysov arnaıy barǵan edi.
Ózbekstan, Tashkent
e-history.kz
2013 jyly Tashkentte QR elshiliginiń aldynda qazaqtyń oıshyly Abaıdyń eskertkishi ornatylǵan. Onyń ashylý saltanatyna Tuńǵysh Prezıdent Nursultan Nazarbaev pen Islam Karımov qatysqan.
Ázerbaıjan, Baký
e-history.kz
2011 jyly Ázerbaıjannyń Baký memlekettik ýnıversıtetinde Abaı Qunanbaıulynyń atyndaǵy ortalyq ashylyp, ǵulamanyń bústi qoıyldy.
Aıta keteıik, Qazaqstannyń 17 óńirinde – Astana, Almaty, Shymkent qalalary men oblystarda uly oıshylǵa arnalǵan 55 eskertkish, búst jáne músindik kompozısıalar ornatylǵan. Almatydaǵy Abaı eskertkishi – respýblıkalyq mańyzy bar mádenı mura nysany, al taǵy 10-nan astamy jergilikti deńgeıde tarıhı jáne mádenıet eskertkishi mártebesine ıe.