Fransıa atom energetıkasyn ótken ǵasyrdyń ortasynan bastap damyta bastady. Úkimet AES-ti negizgi energıa kózi retinde tańdaýdyń elge táýelsizdik pen turaqty, básekege qabiletti elektr energıasynyń qunyn qamtamasyz etetinin túsindi. Qazirgi ýaqytta AES Fransıanyń energetıkalyq qaýipsizdiginiń mańyzdy elementi bolyp tabylady, óıtkeni elde tabıǵı resýrstar shekteýli.
Búgingi tańda Fransıa Eýropadaǵy eń az parnıktik gazdar shyǵaratyn memleket bolyp sanalady. Elde 61 reaktor jumys isteıdi, olar jalpy energıanyń 75%-yn óndiredi, al AES-terdiń ortasha jasy – 28 jyl.
Fransıa álemdegi eń iri elektr energıasyn eksporttaýshy memleket. Óndirilgen elektr energıasy eldiń qajettiliginen 20%-ǵa artyq, al onyń artyq kólemi Italıa, Ulybrıtanıa, Shveısarıa jáne Ispanıaǵa eksporttalyp, jylyna shamamen 3 mıllıard eýro tabys ákeledi.
AES-ter Fransıaǵa Eýropadaǵy eń tómengi elektr energıasy baǵasyn usynýǵa múmkindik berdi. Tipti sýbsıdıalardy esepke alǵanda da elektr energıasynyń bólshek baǵasy tómen deńgeıde. Reaktorlardyń operatory – Elektrite de France, álemdegi eń iri atom elektr stansıalaryn basqaratyn kompanıa, onyń 85%-y memleketke tıesili.
Sonymen qatar, Fransıa AES qaldyqtaryn óńdeý jáne joıý jumystarymen belsendi aınalysady jáne tórtinshi býyn reaktorlaryn ázirleý jobalaryna qatysady.