Bul týraly Azamattyq avıasıa komıteti málimdedi.
Qazaqstandyq tasymaldaýshy áýe reısi keshiktirilgen kezde jolaýshylardy qonaq úıge ornalastyrmaǵan. Áýe operatory tarapynan jolaýshylar quqyǵyn buzǵan jalǵyz bul jaǵdaı ǵana emes, dep habarlaıdy aqshamnews.kz 24.kz-ke silteme jasap.
Jaqynda 12 jastaǵy balany bortqa kirgizbeı, dalada qaldyrǵany taǵy bar. Bir jarym aı buryn egiz balasyn Amerıkaǵa til úıretý kýrstaryna jibergen oraldyq Jazıra Mýsına qyzdarynyń biri úıge qıyndyqpen oralǵanyn habarlady. Nú-Iork-Stambýl, Stambýl-Astana baǵyttary boıynsha sapar sátti oryndalyp, 21 shilde kúni «Flaı Arystan» áýe kompanıasynyń ushaǵymen Astanadan Oralǵa qaıtatyn kezde tehnıkalyq aqaý shyǵyp, kámelet jasqa tolmaǵan bala bóten qalada qaraýsyz qalyp qoıady. Alaıda jolaýshynyń ushý bıleti men qujattary túgel bolǵan.
Jazıra Mýsına, Oral qalasynyń turǵyny: - Balalar jetekshisimen áýe kompanıasy ókiline júgingen sátte barlyǵyn tirkep, ushaqqa otyrý talonyn beredi de, meniń qyzymdy keıinirek tirkep, bortqa ózimiz alyp kelemiz, tehnıkalyq aqaý oryn aldy dep qaldyrǵan. Alaıda qyzym maǵan telefon soǵyp, ushaqqa otyrǵyzbaı jatqanyn aıtady. Sosyn jetekshisine habarlastym. Oǵan da qyzmetkerler Zere ushaqta bolady dep aıtqan eken. Biraq olar ushaqqa otyrǵanda qyzym bolmaǵan. Sóıtip jetekshisi jaǵdaıdy anyqtamaq bolǵanda ushaqtyń esigi jabylyp, oǵan shyǵýǵa tyıym salynǵan. Osylaısha olar ushyp ketedi de, qyzym áýejaıda jalǵyz qalyp, tirkeý orny aldynda 3 saǵat boıy jylaǵan.
Mundaı jaǵdaıǵa qatty narazy bolǵan ana áýe kompanıasyna jáne basqa da birneshe ókiletti orynǵa shaǵym túsirgen. Alaıda esh jaýap bolmaǵan soń, bul jaǵdaıdy kóptiń nazaryna shyǵardy. Qazir endi oqıǵa elge málim bolyp, shýǵa aınalǵan soń áýe kompanıasy keshirim surap, tipti 4 mln teńge kóleminde ótemaqy usyndy deıdi Jazıra Mýsına.
Jazıra Mýsına, Oral qalasynyń turǵyny: - Áýe kompanıasynyń 21 shildeden beri bizden keshirim surap, jaǵdaıǵa túsinikteme beretindeı ýaqyty boldy ǵoı! Olar nege dál qazir jaǵdaı ýshyqqan kezde maǵan habarlasyp tur? Mende qarjylaı paıda kórý degen oı atymen bolmady. Meni tek balamnyń qorǵansyz qalǵany qınady. Aldaǵy ýaqytta mundaı jaǵdaı qaıtalanbasa eken deımin. 12 jastaǵy balany jalǵyz qaldyrý úlken qatelik boldy. Kámelet jasqa tolmaǵan balanyń quqy aıaqqa taptalmaýy kerek!
Iá, 12 jastaǵy bala zardap shekken oqys jaǵdaıǵa qatysty Oqý-aǵartý mınıstrligi balalar quqytaryn qorǵaý komıteti de pikir bildirdi.
QR Oqý-aǵartý mınıstrligi Balalardyń quqyqtaryn qorǵaý komıteti: Bala quqyqtarynyń saqtalýyn buzatyn osy syndy jaǵdaılarǵa jol berýge bolmaıdy. Bul jaǵdaı balanyń qaýipsizdigi men quqyqtarynyń buzylýynyń kórinisi bolyp tabylady. Balalardyń qaýipsizdigi men ál-aýqaty barlyq jandar úshin basymdyq bolýy tıis. Birinshi kezekte avıakompanıa reıske tirkelgen balalarǵa qamqorlyq jasaýy kerek edi.
Áýe kompanıasynyń balany áýejaıda qaldyryp ketýi úlken olqylyq dep otyr Qazaqstan azamattyq avıasıa komıteti. Sebebi qandaı tehnıkalyq aqaý oryn almasyn, jolaýshynyń quqyǵy buzylmaýy kerek deıdi.
Darhan Qatyshev, QR Kólik mınıstrligi azamattyq avıasıa komıteti tóraǵasynyń orynbasary: - Aldyn ala tirkelgen, bılet bolǵan adamdy mindetti túrde ushaqqa otyrǵyzý kerek. Endi óz tarapymnan qazir biz tekseris júrgizeıik dep jatyrmyz. Tekseriske ózimiz jáne Qazaqstan avıasıa ákimshiligi qyzmetkerleri de qatysady. Jan-jaqty tekseris ótkiziledi. Sol tekseris nátıjesi boıynsha búkil sharalar qabyldanady.
Sonymen qatar ákimshilik jaýapkershilikke tartamyz. Azamattyq avıasıa komıteti ókiliniń aıtýynsha, osy shilde aıynyń ózinde «Flaı Arystan» áýe kompanıasy 3 ret ákimshilik jaýapqa tartylǵan. Alaıda myna jaǵdaı qatań tergeý men tekseristi talap etedi.