Almatyda myńdaǵan qala turǵyny men qonaqtary úshin aýqymdy merekelik is-sharalar ótip jatyr.
Astana alańy men Abaı atyndaǵy alańda, Arbatta jáne Tuńǵysh Prezıdent saıabaǵynda vırtýoz jonglerler, ekvılıbrıs sheberleri, ıllúzıonıster, kóńildi kloýndar, sondaı-aq Aıaz ata men Aqshaqar óner kórsetti. Olar kórermenderge naǵyz jańa jyldyq atmosfera syılady, dep habarlaıdy aqshamnews.kz.
Almaty sırkiniń ónerpazdary kórermenderdi fire show-men tań qaldyrdy: artıser lapyldap janǵan quraldarmen jonglerlik etip, túrli trúkter kórsetý arqyly kórermenderdiń ystyq yqylasyna bólendi. Ekvılıbrıs bolsa bıiktigi alty metrge deıingi qurylymdy ornata otyryp, bas aınalatyn bıiktikte asa kúrdeli trúkterdi oryndap, kórermenderdi tań qaldyrdy.
Azıa jáne Qazaqstan Respýblıkasynyń chempıony, armrestlıngten halyqaralyq dárejedegi sport sheberi Tımýr Spataevtyń óneri de áserli boldy. Onyń aýyr zattarmen jonglerlik etýi, qolmen shegeler qaǵýy jáne jylytqyshty shar sıaqty úrleýi syndy alyp-kúsh ıesiniń shoýy keshtiń eń jarqyn sátteriniń birine aınaldy.
Merekelik baǵdarlamada úıretilgen ıtterdiń óneri, saıqymazaqtardyń qatysýymen qoıylǵan oıyn-saýyq nómirleri, ıllúzıonısterdiń sıqyrly kórinisteri men ınteraktıvti baıqaýlar boldy. Aıaz Ata men Aqshaqar barlyq qatysýshyǵa merekelik kóńil-kúı syılap, bı uıymdastyryp, oıyndar ótkizip, Almaty halqyn kele jatqan 2025 jylmen quttyqtady.