Sultan Sháripuly Orazalın – jýrnalıs, jazýshy, teledramatýrg, qoǵam qaıratkeri. Qazaq televızıasynyń qurmetti ardageri. Qazaqstannyń eńbek sińirgen qaıratkeri. Halyqaralyq televızıa jáne radıo akademıasynyń akademıgi. Qazaqstan Jýrnalıser Odaǵy syılyǵynyń jáne Qazaqstan Prezıdentiniń jýrnalısıka salasyndaǵy syılyǵynyń ıegeri.
Belgili fılolog-ǵalym Sultan Orazalın dúnıe saldy, dep habarlaıdy Almaty-akshamy.kz
Aqparat jáne qoǵamdyq damý mınıstri Aıda Balaeva Sultan Orazalınniń qaıtys bolýyna baılanysty marqumnyń otbasy, týǵan-týystaryna kóńil aıtty.
«El rýhanıaty taǵy bir tarlanynan aıyryldy. Alashtyń ardaqtysy, til janashyry, belgili fılolog-ǵalym, qazaq radıosy men televızıasyna erekshe eńbegi sińgen asyl aǵamyz Sultan Orazalın dúnıe saldy. Sanaly ǵumyryn qazaqtyń ádebıeti men mádenıetin dáriptep, týǵan tiliniń tuǵyryn, ultynyń ulyq múddelerin tý etken esil tulǵa artyna alty urpaqqa azyq bolar shyǵarmashylyq úles pen ǵylymı mura qaldyryp ketti. Táýelsizdiktiń tańynda táı-táı basqan jas memlekettiń ıgiligine qyzmetke kelip, ulttyq órisin keńeıtýge bilek sybana kirisken Sultan aǵamyz jyldar óte Úkimet pen Prezıdent janyndaǵy túrli alqalardyń aınymas múshesi, aqylman abyzyna aınaldy. Otandyq til saıasaty, óner men mádenıet máselelerine qatysty qundy ǵylymı izden isteri men kesek oıly shyǵarmalary óskeleń urpaqtyń ilim-bilimine qosylǵan úlken mıras edi. Amal qansha…ajalǵa arasha joq. Dese de, uly tulǵanyń osynaý ulyq joly men ónegesi onyń ómiriniń rýhanı jalǵasy bop máńgilikke el esinde qalady. Jatqan jerińiz jaryq, ımanyńyz berik, topyraǵyńyz torqa bolsyn, asyl aǵa! Osynaý qaıǵyǵa ortaqtasyp, marqumnyń otbasy, týǵan-týystaryna kóńil aıtamyn», - dep jazdy Aıda Balaeva jelidegi paraqshasynda.