Almaty aportynyń dámimen "Qazaqstan" qonaq úıin qaǵaz betine beınelep turǵan sýretshiniń jelidegi beınejazbasyn kórgen bolarsyz. Quddy bir kórkem shyǵarmanyń sýretteýin kóz aldyńyzǵa ákeletin jannyń kim ekenin bilesiz be? Bul - Eýropany baǵyndyrǵan jalǵyz almatylyq kásibı sýretshi Rysbek Iskakov. Aqshamnews.kz tilshisi jeli juldyzyna aınalǵan sýretshimen tildesti.
Kemel keleshekke jetelegen bala arman
Rysbek Iskakov - 1956 jyly Taldyqorǵan oblysy, Úshtóbe qalasynda dúnıege keldi. Ol bala kezinen-aq súıikti isi - beıneleý ónerine ómirin arnady. Sibirdegi Irkýtsk óner ýchılıshesinde bir jyl bilim alyp, keıin Nıkolaı Gogol atyndaǵy kórkemsýret ýchılıshesin támamdady. Birneshe jyl Muhtar Áýezov atyndaǵy teatrda qoıýshy-sýretshi bolyp jumys istedi.
"Eger Qudaı maǵan týǵanymnan osyndaı talant darytsa, onda meniń mısıam - ony ózge júrekterge jetkizý. Beıneleý óneri - sýretshi álemin sıpattaýǵa umtylatyn til. Men úshin ol eń aldymen, halqymyzdyń baı tabıǵaty men biregeı mádenıeti", - deıdi Rysbek ata.
sýret: keıipkerdiń jeke muraǵatynan
Eýropaǵa bastaǵan dańǵyl jol
Sýretshi oqýyn támamdaǵan soń Reseı, Germanıa, Fransıa elderinde 8 jyldan asa ýaqyt jumys istep, óziniń qoltańbasyn qalyptastyrdy. Iskakov kartınalarynda qazaqy ómirdi romantıkalyq reńkte beınelep, ulttyq tematıkadaǵy zamanaýı kartınalardyń avtory atandy.
"Parıjde biraz ýaqyt jumys istedik. Monmartr, Eıfel taǵysyn-taǵy ádemi núktelerdi qaǵazǵa túsirdik. Eýropa maǵan úlken tájirıbe syılady", - deıdi sýretshi.
Sýretshi Parıjde Natalıa Bondareva atyndaǵy galereıaǵa jumystaryn usynǵan. Keıin plener (ashyq aspan astynda sýret salý - esk.) baǵytyn janyna jaqyn tartyp, sýret óneriniń sol tusyna qaraı oıysqan. Qazir ol Otanǵa oralǵan soń da plenerge óte jıi shyǵatynyn aıtty.
sýret: keıipkerdiń jeke arhıvinen (Parıjdegi plener sýretteri)
"Eń qymbat kartınamdy bir kúnde salyp, 4,5 myń dollarǵa sattym"
Plener baǵytynan erekshe shabyt alatyn Rysbek Iskakov Almaty taýlaryn, tabıǵatyn jaqsy kóretinin aıtty. Birneshe jyl boıy Almaty peızajyn beınelep júrip, óziniń eń qymbat kartınasyn bir kúnde salyp bitken:
"Eń qymbat ótken týyndym - kólemi shamamen 2×4 metrlik tapsyryspen salynǵan kartına. Ony Ramazan aıynda, belgilengen merzimge úlgerý kerek bolǵandyqtan, bir kúnde jazyp shyqtym. Baǵasy - 4,5 myń dollar (teńgege shaqqanda 2025 jylǵy qunmen - 2 423 521 teńge). Ónerdiń baǵasy óz aldyna bólek áńgime, biraq men úshin mańyzdysy - oıdyń aıqyndyǵy men nıettiń tazalyǵy" , - deıdi sýretshi Iskakov.
Ol jelide taraǵan vıdeoda plenerde "Qazaqstan" qonaq úıin beınelep turǵan edi. Rysbek ata óziniń jeli juldyzyna aınalǵanyn bilmeı de qalǵan:
"Men Almatyda plenerge óte jıi shyǵamyn. Qazir peızajdan aýysyp, arhıtektýralyq kartınalardy salyp júrmin. Jaqynda meniń vıdeomdy jelide bir kisi taratypty. Kórgen jandar kelip, tanyp jatyr. Men olarǵa alǵysymdy bildirdim de qoıdym", - deıdi sýretshi.
Óner qundylyǵy, JI máselesi: sýretshiniń oıy qandaı?
Sýretshi ónerge arnaǵan ómirde túıgenin, oıyn bólisti:
"Sýret salý - ári eńbek, ári demalys; keıde oryndyǵyń yńǵaısyz, shaı da joq, túski asqa da úlgermeısiń. Biraq shyǵarmań sátti shyqsa, bári umytylady. Óıtkeni ónerdi qadirleý - sol qolaısyzdyqtarǵa tózý. Al qazir shyǵyp jatqan jasandy ıntellekt jumysty jeńildetkenimen, onda sezim joq, sondyqtan ol qansha ýaqyt ótse de shynaıy talanttyń qoltańbasyn, júrek jylýyn, boıaýdy sezinýin almastyra almaıdy" , - dedi sýretshi Rysbek ata.
