16 qazan – Dúnıejúzilik nan kúni. Osyǵan oraı Almaty memlekettik bıznes koleji «NAN-FEST – 2025» atty qalalyq kásibı sheberlik baıqaýyn uıymdastyrdy.
Festıváldiń basty maqsaty – jastardyń eńbekke degen súıispenshiligin arttyrý, naýbaıshy mamandyǵynyń mańyzyn tanytyp, jumysshy mamandardyń qoǵamdaǵy bedelin nyǵaıtý. Soǵan qosa, shyǵarmashylyq arqyly ulttyq dástúr men zamanaýı kásibılikti ushtastyrýdy kózdegen.
Almaty qalasy men Almaty oblysynyń úzdik kolej stýdentterinen bólek, is-sharaǵa Almaty qalasy Bilim basqarmasynyń ókilderi, áleýmettik seriktester, jumys berýshiler jáne BAQ ókilderi qatysty. Olar kásibı bilim salasyndaǵy tájirıbe almasý men seriktestik dıalogtyń jańa múmkindikterin talqylady.
– Búgingi is-shara bárimiz úshin mańyzdy. Qatysýshylar bir-birimen saıysyp qana qoımaı, dostyq qarym-qatynas ornatady dep senemiz. Baıqaýǵa qatysý úshin kolejerge arnaıy shaqyrý jiberdik, árqaısysy eń myqty stýdentterin ózderi usyndy. Baıqaý jeńimpazdaryna áleýmettik seriktesterimiz demeýshilik etedi. Top jaryp, qarajat qoldaryna tıgen stýdentterdiń eńbekke degen qulshynysy arta túsetini anyq, – dedi Almaty memlekettik bıznes kolejiniń dırektory Aınur Muqajanova.
«NAN-FEST» baıqaýy bıyl úshinshi ret uıymdastyrylyp otyr. Alǵashqy jyldardaǵy jetistikterdiń jalǵasy retinde bıylǵy festıvál kásibı tájirıbe men shyǵarmashylyqty toǵystyrǵan jańa deńgeıge kóterildi.
– Bizdiń dastarhanymyzdaǵy nannyń ózinde zor eńbek jatqany bárimizge belgili. Nandy qadirlep aq dastarhanymyzdyń tórine qoıamyz. Nandy qadirleý, ony únemdeý ulttyq dástúrimizge de aınalǵan. Ata-babalarymyzdyń danalyǵyn jastar úlgi-ónege retinde kórse eken deımin. Bul – nanǵa degen qurmettiń belgisi, – dedi «Qalalyq bilim berýdegi jańa tehnologıalar men ǵylymı-ádistemelik ortalyǵy» KMQK Tehnıkalyq jáne kásiptik bilim berý bóliminiń basshysy Gúlnár Súleımenova.
Baıqaýǵa Almaty qalasy men Almaty oblysynyń 12 kolejinen úzdik stýdentter qatysty. Jas naýbaıshylar óz sheberlikterin úsh baǵytta tanytyp, nan pisirýdiń dástúri men zamanaýı tehnologıalaryn úılestirdi. Mundaı baıqaýlar «WorldSkills», «Jasskills» jáne «Jumysshy mamandyqtar jyly» jobalarynyń sabaqtastyǵyn jalǵastyryp, eldiń eńbek naryǵyna sapaly mamandar daıarlaýǵa jol ashady.
«NAN-FEST – 2025» – bul tek kásibı baıqaý emes, eńbek adamyna arnalǵan qurmet merekesi. Baıqaý úsh modýlden turdy: A modýli – «Qısh pırogy»; B modýli – «Hala órimi»; C modýli – «Eńbek jáne dástúr» taqyrybyndaǵy dekoratıvti jumys.
Baıqaý tehnıka qaýipsizdigi, uıymdastyrýshylyq, dám men sapa, kreatıvtilik jáne kásibı sheberlikke qaraı baǵalandy. Baıqaý qorytyndysy boıynsha úzdik stýdentter men tálimgerler arnaıy marapattarǵa ıe boldy. İs-shara Almatynyń kásibı bilim berý keńistiginde jańa serpin berip, halyqaralyq yntymaqtastyq pen eńbek qundylyǵyn dáripteýdiń úlgisine aınaldy.
Jansulý ÁBENBAI, sarapshy:
Tazalyq pen sapaǵa nazar aýdaramyz
Qatysýshylar ózderiniń qabiletterin barynsha kórsetedi. Baıqaýda shydamdylyq, jeńis pen jeńilis jolynda tózimdilik synalady. Baǵalaýda dám men jyldamdyqqa ǵana emes, tazalyq pen sapaǵa da basa nazar aýdaramyz. Ár qatysýshynyń kıgen kıimderi men as daıyndaıtyn ústeldiń tazalyǵy da saı bolýy kerek.
Adel QALAN, qatysýshy:
Baıqaýdan jeńis kútemin
Halyqaralyq ınjenerlik tehnologıalyq ýnıversıeti kolejiniń 2-kýrs stýdentimin. Baıqaýǵa qatysqanyma qýanyshtymyn. Saıysqa bir apta tyńǵylyqty daıyndalyp keldim. Mundaı baıqaýǵa alǵash ret qatysyp otyrǵandyqtan, ustazdaryma jáne qoldap kelgen dostaryma alǵys aıtamyn. Olardyń qoldaýy men úshin asa mańyzdy.