Tennis Europe uıymy bıyl kúzde Monte-Karloda ótetin Junior Masters týrnırine oraı jańartylǵan reıtıńti jarıa etti
Qazaqstan tenıs federasıasy málim etkenindeı, 14 jasqa deıingiler arasynda Zańǵar Nurlanuly burynǵysynsha kósh bastap keledi. Onyń enshisinde 520 upaı bar. Jalpyeýropalyq reıtıńte Zańǵar 4-orynda qaldy, dep habarlaıdy Almaty-akshamy.kz QazAqparatqa silteme jasap.
Al Qazaqstannyń basqa jas juldyzdary Damır Jalǵasbaı men Danıel Tazabekov óz kórsetkishterin jaqsartty. Danıel 37-shi, Damır 39-shy satyǵa kóterildi. Jýyrda Úndistannyń Nú-Delı qalasynda 14 jasqa deıingiler arasynda Azıa/Tynyq muhıt aımaǵy boıynsha ótken irikteý týrnırinde osy tenısshiler 3-orynǵa ıe bolyp, Qazaqstan jasóspirimder quramasy tuńǵysh ret álem chempıonatynyń fınaldyq kezeńine joldama alǵan bolatyn.
Halyqaralyq tenıs federasıasy da 18 jasqa deıingiler arasynda álemdik reıtıńti jańartty. Munda úzdik 100 tenısshiniń qataryna kirgen Maksım Batútenko 77-orynǵa jaıǵasty. Islam Orynbasar 211-inshi, Danııl Felker 269-satyda tur. Danıal Rahmatýllaev birden 393-ten 371-ge, Ámir Omarhanov 704-ten 526-ǵa joǵarylady. Qyzdar arasynda Arýjan Saǵyndyqova 77-ornyn saqtap qalsa, Sandýǵash Kenjebaeva 116-ynshy, Dana Baıdáýlet 147-inshi, Janel Rústemova 156-ynshy, Erkejan Arystanbekova 190-satyda keledi.
Eske sala keteıik, budan buryn Aleksandr Býblıktiń Madrıdte utylyp qalǵanyn, Elena Rybakınanyń shırek fınalǵa óte almaǵanyn jazǵan bolatynbyz.