Qazaqstandyq fýtbolshylar Danıa quramasyn jeńdi
Fýtboldan 2024 jylǵy Eýropa chempıonatynyń irikteý satysynyń toptyq kezeńindegi ekinshi týr oıyny aıaqtaldy. Oıyn alańynda Qazaqstan men Danıa quramalary kezdesti, dep habarlaıdy Almaty-akshamy.kz Azattyq Ruhy-na silteme jasap.
«Astana Arena» stadıonynda ótken kezdesý 3:2 esebimen qazaqstandyqtardyń sensasıalyq jeńisimen aıaqtaldy.
Birinshi taımda Danıa quramasynyń tolyǵymen basymdyq tanytqanyn aıta ketý kerek. Rasmýs Hóılýnniń qos golynan keıin danıalyqtar esep aıyrmasyn uzartyp, taım 0:2 esebimen aıaqtaldy.
Ekinshi kezeńde Qazaqstan quramasy basymdyqqa ıe bolyp, alańǵa ústemdik ete bastady. 73-mınýtta Baktıór Zaınýtdınov penaltı arqyly 1:2 esebine qol jetkizip, alań ıelerine úmit otyn syılady.
Sodan keıin 87-mınýtta Asqat Taǵybergen dopty Peter Shmeıhel qaqpasynyń alys buryshyna bir-aq túsirip, esepti teńestirdi.
Al negizgi ýaqyt aıaqtalǵan 90-mınýtta qazaq fýtbolshylary taǵy bir sensasıa jasap, úshinshi jeńis golyn soqty. Abat Aıymbetovtyń baspen soqqan goly jurtty tánti etti.
Osylaısha, 3:2 esebimen basym túsken Qazaqstan quramasy 17 maýsymda San-Marıno quramasymen syrt alańda oınaıdy dep josparlanyp otyr.
Aıta ketsek, buǵan deıin Danıa quramasymen 4 márte kezdesip, bárinde jeńiliske ushyrap kelgen Qazaqstan quramasynyń bul jeńisi qazaqstandyq jankúıerler úshin úlken qýanysh ekeni ras. Áleýmettik jelilerde otandastyrymyzdyń osy tarıhı jeńiske qýanǵan sáti túsirilgen beınejazbalar kóptep tarap jatyr.
Sonyń biri – Astanadaǵy №40 avtobýs jolaýshylarynyń vıdeosy. Vıdeodan eki el fýtbolshylarynyń oıynyn qoǵamdyq kóliktegi shaǵyn teledıdardan tamashalaǵan jankúıerlerdiń jeńisti sátte qalaı qýanǵanyn kórýge bolady. Avtobýs jolaýshylary qýanyshtan «Qazaqstan! Qazaqstan! Qazaqstan!» dep aıǵaılap, artynsha biraýyzdan Eskendir Hasanǵalıevtiń «Atameken» ánin shyrqady.
Jeli qoldanýshylary beınejazba astyna «Jaraısyńdar! Qazaq eliniń osyndaı qýanyshty sáti kóp bolsyn!», «Eli úshin shyn júrekten qýana biletin osyndaı patrıot jastarymyz qýantady», «Qandaı áserli kórinis!» dep súısingen pikir qaldyryp jatyr.