Kınofestıvalge sońǵy eki jylda túsirilgen 15 úzdik otandyq fılm kirdi
12-18 jeltoqsan aralyǵynda Almatyda XVI Halyqaralyq «Eýrazıa» kınofestıvali ótedi, dep habarlaıdy Almaty-akshamy.kz.
Bıyl Ulttyq kınony qoldaý memlekettik ortalyǵy festıvál seriktesteriniń qatarynda bar ortalyq kómegimen túsirilgen 11 fılm «Eýrazıa» jumysyna qatysady.
Kınofestıvaldiń prezıdenti - belgili rejıser, Qazaqstannyń eńbek sińirgen qaıratkeri Ardaq Ámirqulov.
«Pandemıa kezinde kóptegen mádenı sharalar toqtady, festıválder, konsertter, kınoteatrlar jabylǵany barshaǵa málim. Búgingi tańda jaǵdaı ózgerdi jáne eki jyldyq úzilisten keıin biz «Eýrazıa» kınofestıvalin qaıta jandandyramyz. Festıvál óziniń 1998 jyly negizi qalanyp, aldyńǵy festıválderdiń kópshiligi ótken Almatyǵa qaıta oralady», - dedi ol.
Festıvál Mádenıet jáne sport mınıstrliginiń tapsyrysymen Ulttyq kınony qoldaý memlekettik ortalyǵy kómegimen túsirilgen Sábıt Qurmanbekovtiń «Boran» fılminiń álemdik premerasymen ashylady. Kartına halyqaralyq baıqaýǵa qatysady, onda odan bólek 14 fılm básekege túsedi. Olardyń ishinde Fransıa, Chehıa, Túrkıa, Ýkraına, Grýzıa, Reseı, Iran, Ázerbaıjan, Qyrǵyzstan, Ózbekstan, Qytaı kartınalary jáne kınoortalyqtyń kómegimen túsirilgen taǵy bir otandyq týyndy – «Aǵaıyndylar» fılmi bar. Jas rejıser Darhan Tólegenovtyń fılmi jaqynda Germanıadaǵy Oldenburg International Film Festival bedeldi kınofestıvalinde qazylar alqasynyń arnaıy syılyǵyn alǵan bolatyn.
«Eýrazıada» halyqaralyqtan bólek, konkýrstyq baǵdarlama – ulttyq baıqaý bolady, oǵan sońǵy eki jylda túsirilgen 15 úzdik otandyq fılm kirdi.
Ulttyq baıqaýda Tokıo kınofestıvalinde rejıssýra úshin syılyq alǵan Darejan Ómirbaevtyń «Aqyn» kartınasy, Berlınale-2022 Generation seksıasynda bas júlde jeńgen Farhat Sháripovtyń «Sqema» atty kınosy jáne kóptegen halyqaralyq kınofestıvalderde kózge túsken Aıjan Qasymbektiń «Ot» fılmi sekildi hıttar usynylǵan. Sondaı-aq, munda kınoortalyqtyń eń tabysty týyndysy Aıdyn Sahamannyń «Dos-Muqasan» fılmi, bıyl Qazaqstannan «Oskar» syılyǵyna usynylǵan Emır Baıǵazınniń «Ómir» fılmi, Aldıar Baıraqymovtyń «Paralımpıadashysy» jáne Azız Zaırovtyń «Mama, men tirimin» kartınalary kórsetiledi. Sonymen qatar, bul baıqaýda Serik Aprymovtyń «Aýyl» fılminiń álemdik premerasy kútilýde.
Konkýrstan tys «Erekshe oqıǵa» baǵdarlamasynyń kórsetilimderi bolady, onda ártúrli dáýirler men janrlardaǵy álemdik kıno qaıratkerleriniń, sonyń ishinde mereıtoılyq fılmderdiń retrospektıvalary usynylady. Sonymen birge, qazirgi zamanǵy qazaqstandyq qysqametrajdy kınoǵa arnalǵan «Jańa esimderdi ashý» baǵdarlamasy bar. Ol jerde 2020-2022 jyldary túsirilgen jas rejıserlerdiń úzdik 15 fılminiń kórsetilimderi bolady. Bul baǵdarlamada kınoortalyqtyń taǵy bir jumysy bar, ol - Arýan Anartaevtyń «Ystyq kól» qysqametrajdy kartınasy.
«Festıvál qurylǵan sátten «Eýrazıa» dástúrinde ósken qazaqstandyq kınematografısterdiń tutas býyny qalyptasty. Búginde qazaqstandyq kınematografıa joǵarǵy deńgeıge jetti, sol úshin de oǵan jeke ulttyq baıqaý bólinip otyr. Onda halyqaralyq kınofestıvalderge qatysyp, jeńiske jetken fılmder jáne keń aýdıtorıa arasynda tabysqa kenelgen kartınalar da jarysatyn bolady», - dep atap ótti festıváldiń baǵdarlamalyq dırektory, Qazaqstan kınosynshylar qaýymdastyǵynyń prezıdenti Gúlnara Ábikeeva.
Festıváldiń basqa is-sharalarynan óndiris satysynda turǵan otandyq týyndylardy usynatyn Work-In-Progress baǵdarlamasyn bólip kórsetýge bolady. Bul, ásirese prodúserler men kınofestıval tańdaýshylary úshin qyzyqty bolady. Sonymen birge, kınoındýstrıa sheberlerimen sheberlik synyptary men trenıńter ótedi. Qazylar alqasynyń múshelerimen, festıváldiń sheteldik jáne qazaqstandyq qatysýshylarymen dóńgelek ústelder men baspasóz konferensıalaryn da ótkizý josparlanǵan.
Festıváldiń resmı ashylý men jabylý saltanaty Abaı atyndaǵy Qazaq ulttyq opera jáne balet teatrynda, kıno kórsetilimderi Kinopark 16 kınoteatrynda (Forum saýda-oıyn-saýyq ortalyǵy) ótedi.