Almatyda mektep janyndaǵy lagerlerde balalardyń jazǵy demalysyn uıymdastyrý jóninde baspasóz týry ótti. Oǵan qala ákiminiń orynbasary Ásem Núsipova, bilim basqarmasynyń basshysy Lázzat Jylqybaeva, sondaı-aq qalalyq máslıhat depýtattary men qoǵamdyq keńes músheleri qatysty, dep habarlaıdy almaty-akshamy.kz
Monıtorıń barysynda qatysýshylar úsh mekteptiń janyndaǵy lager, Almaty tehnologıalyq koleji bazasyndaǵy lager jáne Alataý aýdany Oqýshylarynyń ınovasıalyq shyǵarmashylyq ortalyǵy baǵdarlamasymen tanysty.
Alǵashqy nysan bıyl alǵash ret etnıkalyq lager ashqan №57 jalpy bilim beretin mektep boldy. Mektep aýmaǵynda ishi dástúrge saı bezendirilgen kıiz úıler ornatylǵan. Onda oqýshylar úshin ulttyq oıyndar, baıqaýlar men vıktorınalar uıymdastyrylady. Balalar baýyrsaq, qurt pisirip dombyra shertip, sándik-qoldanbaly ónermen aınalysýdy úırenedi. Munyń bári balalardy, ásirese ulttyq salt-dástúrlerdi, qazaqy qundylyqtardy, mádenıet pen ádet-ǵurypty tolyq sińirý úshin uıymdastyrylǵan.
«Bıyl jazǵy demalysta 266 myń bala qamtylady. Basymdyq kópbalaly jáne az qamtylǵan otbasylardan shyqqan balalarǵa, ata-anasyz qalǵan balalarǵa beriledi. Bul joly biz balalarǵa arnalǵan etnolagerler men sport keshenderin uıymdastyrdyq. Bizdiń maqsat - balalardy mádenıet pen sportqa baýlý. Demalys paıdaly, fýnksıonaldy ári balalardyń damýyna baǵyttalǵan. Mektep janyndaǵy barlyq lagerde tegin ystyq tamaq uıymdastyrylǵan», - dedi Almaty ákiminiń orynbasary Ásem Núsipova.
Kelesi nysan №63 mekteptiń janyndaǵy sport lager, onda jýrnalıserge demalystyń qalaı uıymdastyrylǵany kórsetildi. Tálimgerler kún saıyn balalardy zıatkerlik jáne shyǵarmashylyq oıyndarǵa úıretedi, sporttyq baıqaýlar men vıktorınalar uıymdastyrady. Qalada barlyǵy osyndaı 16 lager ashylǵan.
Budan keıin baspasóz týryna qatysýshylar Áýezov aýdanyndaǵy Almaty tehnologıalyq koleji bazasyndaǵy jazǵy lagerdiń jumysymen tanysty. Munda demalys jáne kásibı baǵdar syndy paıdaly nárseni biriktire bilgen. Bul «Jaz – bolashaq mamandyqpen» jobasynyń arqasynda júzege asqan.
Baspasóz týry aıasynda qatysýshylarǵa 8 synyp oqýshylary ıtalándyq makaron daıyndaýdy úırenip jatqan as úı kórsetildi. Jalpy, munda mektep oqýshylary aspazdyq, kondıterlik, naýbaıhana boıynsha sheberlik dáristerinen ótip, barısta jáne daıashy retinde klıentterge qyzmet kórsetýdi úırenedi.
«Lagerdegi kondıterlik kýrsqa qatysamyn, keks pisirýdi úırenip aldym, reseptin bilemin. Bul jerde qysqa merzimde reseptpe tanysyp, as ázirlep, qatelesken jerimdi túsindim. Ádette mundaı sheberlik dáris aqyly, al munda tegin úırenýge bolady, ónim bizge beriledi», - dedi №147 mekteptiń 8-synyp oqýshysy Aısha Hamıtqyzy.
Baspasóz týry sońynda qatysýshylar Alataý aýdany Oqýshylarynyń ınovasıalyq shyǵarmashylyq ortalyǵyna at basyn burdy. Balalar úshin arnaıy baǵdarlama ázirlendi: jazǵy ýaqytta oqý sabaqtary oıyn túrinde ótkiziledi. Bul balalardy qyzyqtyrý úshin qolǵa alynǵan. Lagerde balalar ızostýdıa, vokaldyq-estradalyq úıirme, sport seksıalary, robototehnıka, avıamodeldeý, sýret salý, mobılografıa jáne bı sıaqty sabaqtarǵa qatysa alady.
Erekshe qajettiligi bar balalarǵa basa nazar aýdarylady. Olar úshin usaq motorıkany damytýǵa baǵyttalǵan seksıalar qarastyrylǵan.
«Qoǵamdyq keńes janyndaǵy áleýmettik komısıa músheleri qalanyń mektep janyndaǵy lagerleriniń reıtıńisin shyǵarady. Lagerler ornalastyrý sharty, tamaqtanýdy uıymdastyrý, qaýipsizdik pen ınklúzıvtilikti qamtamasyz etý, ınfraqurylymnyń jaı-kúıi jáne t.b. krıterıı boıynsha baǵalandy. Jalpy, qaladaǵy mektep janyndaǵy lagerlerdiń jumysy jaqsy uıymdastyrylǵanyn, balalardyń bos ýaqytyn tıimdi ótkizý múmkindigi jan-jaqty qarastyrylǵan», - dedi Almaty Qoǵamdyq keńesiniń múshesi Rafael Gasanov.
