Almatylyq sýretshi-ıllústratordyń eńbekteri áleýmettik jelide myńdaǵan qaralym jınap, tipti sheteldikterdiń nazaryn aýdardy, dep habarlaıdy aqshamnews.kz 24KZ-ke silteme jasap.
Marıa Ilnıskaıa etno-shık stılinde jumys isteıdi, ulttyq mádenıetti zamanaýı baǵytpen úılestiredi. Sońǵy jumystarynyń biri – №2 Oqýshylar úıiniń qabyrǵasyndaǵy «Bilim» mýraly. Bul týyndyny jergilikti jurt jyly qabyldady. Ashyq, qanyq tústerge baı, kóńilge qýanysh uıalatady.
Ónersúıer qaýym Marıa Ilnıskaıanyń jumystaryn dál osylaı sıpattaıdy. Áleýmettik jelilerde belsendi.
Erekshe tehnıkasy men keselerdi beıneleýge degen qushtarlyǵy onyń qoltańbasyn daralaıdy. Marıa beıneleý ónerin 12 jasynda bastaǵan. Al etno-shık janrynda sýret sala bastaǵanyna 5 jyl boldy.
Marıa Ilnıskaıa, sýretshi-ıllústrator: - Men basqa elderde turǵanda etnostyń joǵary baǵalanatynyn baıqadym. Qazir úlken tolqyn, úlken úrdis bar – biz qaıdan keldik, ata-babalarymyz kim bolǵan, túp-tamyrymyz qandaı degen suraqtarǵa nazar aýdara bastadyq. Sondyqtan osyndaı ádemi úılesim – zamanaýı, jahandanǵan álem men tereń mádenı murany ushtastyrý etno-shık dep atalatyn baǵyttyń paıda bolýyna sebep boldy.
Qazir sıfrlyq ılústrasıa kóp qoldanylady. Alaıda Marıa: «Beıneleý óneri janyma jaqyn», – deıdi. Ol kenepte ǵana emes, ǵımarattardyń qabyrǵalarynda da sýret salady. Solardyń biri – balalardy damytý ortalyǵynyń qasbetinde ornalasqan «Bilim» mýraly. 9 da 20 metrlik alyp týyndyny qala turǵyndary joǵary baǵalady.
Aqylbaı Óserbaıuly, Almaty qalasynyń turǵyny: - Osy kartınany kórip júrmin, biraq asa mán bergenim joq. Sebebi qazir polotnolardy kompútermen jasap shyǵarady ǵoı, solaı shyǵar dep oıladym da, mán bergenim joq. Alystan kóz tartady. Kólemi qansha úlken bolsa da, óte keremet, sheber salynǵan.
Bul mýraldy salýǵa aýqymdylyǵy ǵana emes, sonymen qatar aýa raıynyń qolaısyzdyǵy qıyndyq týdyrǵan. Soǵan qaramastan sýretshiniń ıdeıasy iske asty.
Marıa Ilnıskaıa, sýretshi-ıllústrator: - Ilústrasıanyń negizgi ıdeıasy – bilim týraly oılaǵanda kóz aldymyzǵa elesteıtin kórinisti sıpattaý. Bul mindetti túrde bultsyz, jyly, jaryq kún. Úziliske shyqqan balalar asyr salyp júgirip, qýanyshqa bólenedi. Olar ártúrli, biraq sonymen birge óte tatý, bir-birin qurmetteıdi. Bul sýret bir kishkentaı Qazaqstannyń beınesi sıaqty kórinedi.
Marıanyń armany – Qazaqstanda art-bıznesti damytý, jas talanttarǵa beıneleý óneriniń qyr-syryn úıretetin mektep ashý.