Almaty ákimi Darhan Satybaldy 1950-jyldary salynǵan Iablochkov kóshesindegi eski úılerdi aralap kórdi, dep habarlaıdy aqshamnews.kz
Turǵyndar qaıta jańartý men kóshirý jumystaryn jedeldetýdi surady. Qala basshysy eski úılerdi súrý kezinde eń bastysy, adamdardyń baspanasyz qalmaýyn qamtamasyz etý ekenin aıtty. Barlyq sheshim tek zań aıasynda qabyldanatynyn jetkizdi.
«Barlyq sheshim zańdy bolýǵa kerek. Erteń prokýratýra daý týdyrmas úshin hattamalardy tekseremiz. Eń mańyzdysy, turǵyndarǵa yńǵaıly ári bizge jumysty jalǵastyrýǵa múmkindik beretin sheshim tabý kerek», — dedi ákim.
Jetisý aýdanyndaǵy Iablochkov kóshesinde ornalasqan №1 jáne №3 úıler – 1953-1954 jyldary salynǵan eki qabatty qańqaly-qamysty ǵımarattar. Barlyǵy 16 páter bar. Úılerdiń jaǵdaıy nashar: qabyrǵasynda syzat paıda bolǵan, sylaq úgitilip túsken. İrgetasy shógip, tóbe men qabyrǵa arasynda sańylaýlar paıda bolyp, eden qısaıyp ketken, shatyrdan tamshy aǵady. 70 jyldan astam ýaqy boıy kúrdeli jóndeý júrgizilmegen.
«QazQǴZI» AQ 2017-2018 jyldary júrgizgen turǵyn úı qorynyń tehnıkalyq túgendeýi boıynsha Iablochkov kóshesindegi №1 jáne №3 úıler eski dep tanylǵan. Olardy súrip, turǵyndardy kóshirý qajet. Osy aýmaqtyń Shamıeva kóshesinde taǵy eki eski úı bar.
Qala ákimi Darhan Satybaldynyń aıtýynsha, qazir kóshirýdiń túrli nusqasy qarastyrylyp jatyr. Turǵyndar jańa páterdiń Almatynyń qaı aýdanynan beriletini mańyzdy emes ekenin aıtty. Máselen, Naýryzbaı aýdanynda qonystana berýge bolatyn daıyn páterler bar.
Ákimniń aıtýynsha, eski úılerdiń turǵyndaryn kóshirý - mańyzdy áleýmettik mindet, ony qala turǵyndarynyń múddesin saqtaı otyryp, zańdylyq pen ashyqtyq negizinde sheshý qajet.